ەكس-مينيستر بيشىمبايەۆتىڭ ىسىنە قاتىستى تەرگەۋ جۇمىستارى اياقتالدى. بۇل تۋرالى ادۆوكات جاننا مۇحامادي حابارلادى.
"اپتا سوڭىندا سالتانات نۇكەنوۆانىڭ ولىمىنە قاتىستى تەرگەۋ اياقتالعانى تۋرالى حابارلاما كەلدى. ءقازىر ءبىزدى قىلمىستىق ىسكە قاتىستى جۇرگىزىلگەن ساراپتامالىق ماتەريالدارمەن تانىستىردى. الايدا ءىستىڭ ماتەريالدارىن ءالى تولىق كورگەنىمىز جوق. مۇنداي ىستەرگە قاتىستى مەنىڭ ۇلكەن تاجىريبەم بار دەپ ايتا الامىن. بۇعان دەيىن ادام ولىمىنە بايلانىستى قىلمىستىق ىستەرگە ادۆوكات رەتىندە قاتىستىم. الايدا ساراپتاما ناتيجەلەرىن كورىپ شوشىدىم. مۇنداي قاتىگەزدىكتى، سالقىنقاندىلىقتى العاش كورۋىم. سالتاناتتىڭ تۋىستارىنا دەگەن قۇرمەتپەن ءىستىڭ بۇگە-شەگەسىنە دەيىن ايتا المايمىز. تاراپتار ءىس ماتەريالدارىمەن تانىسىپ، قورعاۋ وتىنىشتەرىن مالىمدەگەننەن كەيىن شەشىم قابىلداۋ ءۇشىن پروكۋراتۋراعا جىبەرىلەتىن بولادى"، دەپ جازدى ادۆوكات.
جاننا ءمۇحاماديدىڭ ايتۋىنشا، اسا اۋىر قىلمىس جاساعانى تۋرالى حابارلاماعانى ءۇشىن التى مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا تارتىلۋعا، التى جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋ جازاسى قولدانىلماق.
پىكىر قالدىرۋ