توتەنشە جاعدايلار ءمينيسترى سىرىم ءشارىپحانوۆ قاراعاندى وبلىسىندا كوستەنكو اتىنداعى شاحتادا بولعان اپاتتان كەيىنگى ۇكىمەتتىك كوميسسيانىڭ تەرگەۋ قورىتىندىسىن ءبولىستى.
ءمينيستردىڭ ايتۋىنشا، تەرگەۋگە قاتارداعى قىزمەتكەرلەر ەمەس، توتەنشە جاعدايعا تىكەلەي جاۋاپتى ينجەنەرلىك-تەحنيكالىق پەرسونال الىنعان.
"ۇكىمەتتىك كوميسسيا جۇمىسىنىڭ قورىتىندىسى بويىنشا ءبىز 19 ادامدى انىقتادىق. بۇل جاۋاپتى لاۋازىمدى تۇلعالار. ماتەريالدار تەرگەۋ ورگاندارىنا تاپسىرىلعان، ولاردىڭ كىناسىن سوت انىقتايدى"، - دەپ مالىمدەدى ءشارىپحانوۆ ۇكىمەتتە وتكەن بريفينگتە.
وسى ورايدا مينيستر تەرگەۋگە الىنعان لاۋازىمدى تۇلعالاردىڭ ەسىمىن اتادى.
"امت باس ديرەكتورى يابلونسكيي، پەرسونال جونىندەگى ديرەكتور ۆينوكۋروۆا، كومىر دەپارتامەنتىنىڭ تەحنيكالىق ديرەكتورى بەلىي مىرزا، كومىر دەپارتامەنتى اتقارۋشى ديرەكتورىنىڭ ورىنباسارى وگاي جانە تاعى باسقالارى"، - دەدى ول.
توتەنشە جاعدايلار ءمينيسترى كوستەنكو اتىنداعى شاحتادا بولعان اپاتتى تەرگەۋگە قازاقستاننان جانە شەتەلدەردەن ساراپتامالىق ۇيىمدار تارتىلعانىن ايتتى.
"اپات سەبەپتەرىن تەرگەۋ اياسىندا ۇكىمەتتىك كوميسسيا مۇشەلەرىمەن بىرگە شاحتاعا ءتۇستىم. ءبىز وتە ماڭىزدى ولقىلىقتاردى انىقتادىق. تاۋ-كەن قازبالارىندا شاحتا جابدىقتارى جىلجىپ كەتكەن. 15-تەن اسا وقشاۋلاعىش بوگەت پەن جەلدەتۋ قۇرىلىسى قيراعان"، - دەدى ۆەدومستۆو باسشىسى.
پىكىر قالدىرۋ