ەلىمىزدەگى ەڭ ءىرى بانكتەردىڭ ءبىرى حالىق بانك. جۇرتتىڭ كوبى زەينەتاقىسىن، جورگەكپۇل، جاردەماقى سەكىلدى مەملەكەتتىك تولەمدەردى تەك وسى بانك ارقىلى الادى.

سودان با ەكەن، تاپ ءبىر مەملەكەتتىك مەكەمە سەكىلدى ءىسى ءتۇسىپ كەلگەن حالىققا جوندەپ قىزمەت كورسەتپەيتىن جامان ادەتىنەن ءالى ارىلا الماي كەلەدى.

ماسەلەن، مەملەكەتتىك ەمحانالار كوزىمەن ءسۇزىپ الارداي «نەگە كەلدىڭ؟» دەگەن سىڭايمەن قارسى السا، جەكەمەنشىك ەمحانانىڭ ءار كليەنتىنە استى-ۇستىنە ءتۇسىپ قىزمەت ەتەتىنى راس.

– حالىق بانكتىڭ مەنەدجەرلەرى دە سۇستى. سالەم-ساۋقات جوق. ادامدارعا ەمەس، ايۋاندارعا قىزمەت ەتىپ جاتقانداي. ەسەپشوتتى ءموبيلدى قوسىمشاسىنان اشۋعا بولادى. ءبىراق ول ىستەمەي تۇر. ورىسشا ءماتىن شىعادى. الماتىداعى ءال-فارابي 34-تەگى كەڭسەسىنە سوقتىم. ۇلكەن زال. ادام جوق. تالون الدىم. بەس مينۋتتاي كۇتتىم. مەنەدجەرلەر بوس ءجۇر. ءبىرى قولىنا كرۋجكا ۇستاپ، ارلى-بەرلى ءجۇردى. ءبىرى شاماسىمەن اجەتحاناعا بارىپ-كەلىپ ءجۇر. كليەنتكە جىلدام قىزمەت كورسەتۋدىڭ ورنىنا بانك قىزمەتكەرلەرى بىر-بىرىنە سىلتەپ، دورەكى سويلەيدى، دەپ جۋرناليست شىڭعىس مۇقان ءۇش كۇن بويى ونلاين دا، وفلاين دا ەسەپشوت اشا الماي، قينالىپ جۇرگەنىن اشىنا جازدى كۇنى كەشە الەۋمەتتىك جەلىدە.

«حالىق بانك» ەمەس، حالىققا قارسى، انتيحالىق بانك بۇل» دەگەن دياگنوز قويدى ول وسى بانككە.

حالىق بانكىنىڭ تۇتىنۋشىلارى بانكتەگى قىزمەت بىلاي تۇرسىن، ونىڭ ءموبيلدى قوسىمشاسىنا دا شاعىمدانىپ جاتادى.

«حالىقتىڭ قوسىمشاسى تىم تۇسىنىكسىز. نە قايدا تۇر؟ باسىڭ قاتادى. سالاق قاتىننىڭ بۇكتەگەن كيىمىندەي ۇستى-ۇستىنە ۇيە بەرگەن بىردەڭە. ونىڭ جانىندا كاسپي قازاقتىڭ ءوزى سياقتى قاراپايىم عوي. مەكتەپتەگى بالاعا دا تۇسىنىكتى»، دەگەن ەكەن جاراس اليپبايەۆ ەسىمدى وقىرمان.

اقىر اياعى حالىق بانكتىڭ قاي قىزمەتىن پايدالانساڭىز دا، كوبى اقىلى. ماسەلەن، بىرەۋگە اقشا اۋدارساڭىز دا، بانكوماتتان اقشا شىعارساڭىز دا 1 پايىز كوميسسيا ۇستايدى. بانكتەن بانككە اۋدارىلعان اقشا تەك 3 كۇننەن كەيىن عانا تۇسەدى دەيدى. ەلدەگى الدىڭعى بانك سانالسا دا، قىزمەتىنە قاتىستى سىن كوپ بوپ تۇر ازىرگە.