ەكولوگيا جانە تابيعي رەسۋرستار ءمينيسترى ەرلان نىسانبايەۆ 10 اقپاننان باستاپ قازاقستاندا اقبوكەندەردى اتۋ توقتاتىلعانىن مالىمدەدى.

"كيىكتەردى اتۋ ءقازىر توقتاتىلدى. وتاندىق عالىمدارمەن جانە حالىقارالىق ساراپشىلارمەن كەڭەسىپ، پىكىرتالاس جۇرگىزگەننەن كەيىن كيىك اتۋ توقتاتىلدى. سونىمەن قاتار، ءقازىر قىس كەزىندە دالادا ءجۇرۋ قيىندادى. بىلتىرعى جىلدى ەسكەرە وتىرىپ، بيىل مامىر ايىندا ەگجەي-تەگجەيلى ەسەپ جۇرگىزىلەدى. سوندىقتان 10 اقپاننان باستاپ كيىكتەردىڭ سانىن رەتتەۋ پروسەسىن توقتاتتىق. الدىن الا ەسەپتەۋ بويىنشا شامامەن 40 پايىز ءوسىم بولدى. جالپى، بىلتىرعى ءوسىمدى ەسەپكە العاندا تولدەيتىن ۋاقىتتا شامامەن 2،5-2،6 ميلليون باس بولادى. ءتىپتى پەسسيميستىك جاعدايدا دا بيىل ءوسىم بايقالادى"، - دەدى مينيستر ءماجىلىس كۋلۋارىندا.

ەسكە سالا كەتسەك، ماماندار 2023 جىلدىڭ كۇزدە ەلدەگى اقبوكەن سانى 2،6 ميلليونعا جەتەدى دەپ بولجاعان. بۇلايشا پوپۋلياسيانىڭ ءوسۋى وڭىرلەردەگى شارۋالاردى شىعىنعا ۇشىراتىپ، جايىلىمدىق جەرلەردىڭ تاپشىلىعىن تۋدىرۋى مۇمكىن ەكەنى دە ايتىلدى. سانى 1،9 ملن-عا جەتكەن كيىك قوستاناي، قاراعاندى، اقمولا، اقتوبە، بقو-دا ەگىس القاپتارىن تاپتاعان. شامامەن 122 مىڭ گا ەگىس القاپتارىنا 12 ملرد تەڭگەگە شىعىن كەلگەن. سول سەبەپتى ۇكىمەت كيىك سانىن قولدان ازايتۋدى «قارال» ءتاسىلى بويىنشا جۇرگىزە الماعاندىقتان، اتۋعا رۇقسات بەردى.