ءماجىلىس دەپۋتاتى ەرلان سايىروۆ كوپبالالى انالاردىڭ ءتىسىن تەگىن ەمدەپ بەرۋدى ۇسىنىپ، پرەمەر-مينيستردىڭ ورىنباسارى تامارا دۇيسەنوۆاعا ساۋال جولدادى.

   دەپۋتاتتىڭ ايتۋىنشا، ەكونوميكانى دامىتاتىن باستى قاينار كوز – ادام.

– ادامدى دۇنيەگە اكەلەتىن – ايەلدەر. مەملەكەت ولارعا قامقورلىق جاساپ، ولاردىڭ جان-دۇنيەسىن ايالاپ، دەنساۋلىعىنا باسا ءمان بەرۋىنە مىندەتتى. ەلىمىزدە ايەل بوسانعاننان كەيىن دەنساۋلىعىن ساقتاۋ ءۇشىن قانداي شارالار قاراستىرىلعان؟ بالا تۋعاننان كەيىن بەرىلەتىن جاردەماقى بار. ونىڭ مولشەرى – 1-3 بالاعا 140 مىڭ تەڭگە، ءتورت جانە ودان كوپ بالاعا 232 مىڭ تەڭگە قاراستىرىلعان. شىندىقتى ايتساق، بۇل – ايەلگە ەمەس، بالانىڭ كۇتىمىنە بەرىلەتىن سوما، – دەدى ەرلان سايىروۆ.

سونداي-اق  دەپۋتات شەتەلدە بالا كۇتىمىنە بەرىلەتىن سوما جوعارى ەكەنىن ايتادى. ماسەلەن، رەسەيدە انا كاپيتالىنىڭ سوماسى ءبىرىنشى بالاعا 639 مىڭ رۋبل (3 ملن 195 مىڭ تەڭگە)، ەكىنشى بالاعا 883 مىڭ رۋبل (7 ملن تەڭگە) بەرىلەدى.

– قازاقستانعا دا لايىقتى، ادىلەتتى انا كاپيتالىن جاساقتايتىن ۋاقىت جەتتى. بۇل – كەزەك كۇتتىرمەيتىن ماسەلە. ەلىمىزدە ۇزاقمەرزىمدى دەموگرافيانى دامىتۋ ستراتەگياسىنىڭ باستى اسپەكتىسى – لايىقتى انا كاپيتالىن قالىپتاسىرۋ. انا بالا كوتەرگەندە، قۇرساقتا بالانىڭ قالىپتاسۋىنا كالسييدى كوپتەپ جۇمساپ، ءوزىنىڭ تىسىنەن ايىرىلاتىنى – مەديسينالىق فاكت. 543 مىڭ كوپبالالى ايەلدىڭ بارلىعىنىڭ باسىندا بار پروبلەما – ءتىستىڭ ءتۇسۋى، – دەي وتىرىپ، كوپبالالى انالاردىڭ ءتىسىن تەگىن ەمدەپ بەرۋدى ۇسىندى.

– قازاقستانداعى ستوماتولوگيا باعاسىنىڭ كۇيىپ تۇرعانىن ءبارىمىز جاقسى بىلەمىز! سوندىقتان ءبىرىنشى كەزەكتە كوپبالالى انالارعا ءتىسىن جوندەۋ ءۇشىن بىررەتتىك قارجىلىق تولەم قالىپتاستىرۋ قاجەت. بالا تاپقان ايەلدەردىڭ دەنساۋلىعىن قالىپقا كەلتىرىپ، ۇستاپ وتىرۋدىڭ مەملەكەتتىك ستاندارتتارى كەرەك، – دەدى دەپۋتات.