الماتى قالاسى اكىمىنىڭ ەكس-ورىنباسارى ارمان ورازباي ۇلى قىرىقبايەۆ پرەزيدەنت اكىمشىلىگى كوممۋنيكاسيالار ءبولىمىنىڭ مەڭگەرۋشىسى لاۋازىمىنا تاعايىندالدى. بۇل تۋرالى اقوردا سايتى حابارلادى.

ارمان قىرىقبايەۆ 1976 جىلى 20 قازاندا سەلينوگراد قالاسىندا دۇنيەگە كەلگەن. قازاق مەملەكەتتىك باسقارۋ اكادەمياسىنىڭ، سونداي-اق قازاقستان رەسپۋبليكاسى سىرتقى ىستەر مينيسترلىگىنىڭ ديپلوماتيالىق اكادەمياسىنىڭ تۇلەگى. ماماندىعى بويىنشا حالىقارالىق ەكونوميست.

مەملەكەتتىك قىزمەتتە، مادەنيەت جانە جاستار ساياساتى سالاسىندا 25 جىلدان استام ەڭبەك ءوتىلى بار.

ەڭبەك جولىن 1996 جىلى قازاقستان رەسپۋبليكاسى سىرتقى ىستەر مينيسترلىگىنىڭ رەفەرەنتى، اتتاشەسى بولىپ باستاعان.

ءار جىلدارى قازاقستان رەسپۋبليكاسى سىرتقى ىستەر مينيسترلىگىنىڭ ءۇشىنشى، ەكىنشى حاتشىسى، «ABE كورپوراسياسى» مەن «ك-مارت» جشس-نىڭ باس ديرەكتورى، الماتى قالاسى مەدەۋ اۋدانى اكىمىنىڭ ورىنباسارى، الماتى قالاسى جاستار ساياساتىن دامىتۋ مەملەكەتتىك قورىنىڭ ديرەكتورى، مادەنيەت جانە اقپارات مينيسترلىگى قوعامدىق-ساياسي جۇمىس جانە جۇرتشىلىقپەن بايلانىس دەپارتامەنتىنىڭ ديرەكتورى، مادەنيەت كوميتەتىنىڭ ءتوراعاسى، قاراعاندى وبلىسى اكىمىنىڭ ورىنباسارى قىزمەتتەرىن اتقاردى.

مادەنيەت جانە اقپارات ۆيسە-مينيسترى لاۋازىمىندا، Nur Otan پارتياسى ءتوراعاسى ءبىرىنشى ورىنباسارىنىڭ كەڭەسشىسى، الماتى قالاسى اكىمىنىڭ ورىنباسارى، Nur Otan پارتياسىنىڭ حاتشىسى سەكىلدى قىزمەتتەردە بولعان.

سوڭعى اتقارعان قىزمەتى – الماتى قالاسىنىڭ اكىمى ەربولات دوسايەۆتىڭ ورىنباسارى.