پرەزيدەنت ق.توقايەۆ كەلەسى جىلى بولاتىن ۇلى جەڭىستىڭ 80 جىلدىعىنا ازىرلىكتى قازىردەن باستاۋ كەرەكتىگىن ايتىپ، تالدىقورعانداعى اۋە بازاسىن ۇشقىش سەرگەي لۋگانسكييدىڭ اتىمەن، «ايبىن» وردەننىڭ ءتۇرلى دارەجەسىن بەلگىلى باتىرلاردىڭ ەسىمىمەن اتاۋ باستاماسىن كوتەردى.

– جەڭىستىڭ 80 جىلدىعىنا وراي زەرتتەۋلەر تىڭ قارقىنمەن جالعاسادى دەپ سەنەمىن. سۇراپىل سوعىس كەزىندەگى اعا بۋىننىڭ وشپەس ەرلىگى مەن ەرەن ەڭبەگىن ۇرپاق جادىندا جاڭعىرتۋ وتە ماڭىزدى. مەملەكەت بۇل باعىتتاعى جۇمىستى جالعاستىرا بەرەدى. مالىك عابدۋللين، سابىر راحيموۆ، ءاليا مولداعۇلوۆا، مانشۇك مامەتوۆا جانە باسقا دا باتىرلاردىڭ ەسىمى ەلدى مەكەندەرگە، ءتۇرلى نىساندارعا، كوشەلەرگە بەرىلگەن.

بۇل باعىتتاعى جۇمىستى جالعاستىرۋ قاجەت. وسى ورايدا، مايدان شەبىندە ەرەكشە قاھارماندىعىمەن دارالانعان ايگىلى ۇشقىش، كەڭەس وداعىنىڭ ەكى مارتە باتىرى سەرگەي لۋگانسكييدىڭ ەرلىگى لايىقتى باعالانۋعا ءتيىس. الماتىنىڭ ءبىر كوشەسى وسى قالادا تۋعان داڭقتى ۇشقىشتىڭ ەسىمىمەن اتالادى. قازاقستان اۋە قورعانىسى كۇشتەرىنىڭ تالدىقورعانداعى اۋە بازاسىن دا سەرگەي لۋگانسكييدىڭ اتىمەن اتاعان ءجون دەپ سانايمىن، – دەدى ول ۇلتتىق قۇرىلتاي وتىرىسىندا.

سونداي-اق پرەزيدەنت «ايبىن» مارتەبەلى وردەننىڭ ءتۇرلى دارەجەسىن ساعادات نۇرماعامبەتوۆتىڭ، باۋىرجان مومىش ۇلىنىڭ جانە راقىمجان قوشقاربايەۆتىڭ ەسىمىمەن اتاۋدى ۇسىندى.

– بۇل تاريحي ادىلدىكتى قالپىنا كەلتىرۋ جولىنداعى ماڭىزدى قادام بولماق. سول ارقىلى قاھارماندارىمىزدىڭ ەرلىگىن ۇرپاق جادىندا جاڭعىرتامىز. بۇل باستاما وسى ماراپاتتىڭ مازمۇنىن بايىتا تۇسەدى. حالقىمىزدىڭ ءبىرتۋار پەرزەنتتەرىنە ءتان ەرلىك رۋحى وسى وردەندەردىڭ مارتەبەسىن بيىكتەتەدى. سونداي-اق ناگرادا يەگەرلەرىنە وتانىمىزعا قالتقىسىز قىزمەت ەتۋگە ەرەكشە جىگەر بەرەدى. مەن بۇعان كامىل سەنەمىن، – دەدى پرەزيدەنت.