پرەزيدەنت ق.توقايەۆ ەسىرتكى، قۇمار ويىن مەن ۆەيپ سياقتى جاعىمسىز ادەتتەرمەن كۇرەس شارالارىن قاتاڭداتۋ تۋرالى باستاما كوتەردى.
توقايەۆ ءقازىر پارلامەنتتە ۆەيپتەردى ەلگە اكەلگەن، ونى وندىرگەن جانە تاراتقان ادامداردى قىلمىستىق جاۋاپكەرشىلىككە تارتۋدى كوزدەيتىن زاڭ جوباسى قارالىپ جاتقانىن اتاپ ءوتىپ، لۋدومانياعا زاڭ جۇزىندە شەكتەۋ قويۋ قاجەتتىن، ەسىرتكى زاتتارىن وندىرەتىن ادامداردىڭ جازاسىن ەڭ اۋىر قىلمىستارعا تەڭەستىرۋ كەرەكتىگىن جەتكىزدى.
– ءبىز ناشاقورلىققا جانە ەسىرتكى بيزنەسىنە قارسى كۇرەسۋ ءۇشىن كەشەندى جوسپار قابىلدادىق. ۇكىمەت لۋدومانيامەن كۇرەسكە قاتىستى ءدال سونداي جوسپار قابىلداۋى كەرەك. قۇمارپازدىققا زاڭ جۇزىندە شەكتەۋ قويۋ قاجەت. «Amanat» پارتياسى فراكسياسىنىڭ باستاماسىمەن وسى ماسەلە بويىنشا ءتيىستى زاڭ جوباسى ازىرلەندى. پارلامەنتتە قارالىپ جاتقان سول جوبانى وسى سەسسيانىڭ سوڭىنا دەيىن قابىلداۋ قاجەت.
ءقازىر ەسىرتكى ساتقان قىلمىسكەر قاتاڭ جازاعا تارتىلادى. مەنىڭ ۇسىنىسىم: ەسىرتكى زاتتارىن وندىرەتىن ادامداردىڭ جازاسىن بارىنشا قاتايتۋ كەرەك. ونى ەڭ اۋىر قىلمىستارعا تەڭەستىرۋ قاجەت. پارلامەنتتى بۇل باستامانى قولداۋعا شاقىرامىن، – دەدى توقايەۆ ۇلتتىق قۇرىلتاي وتىرىسىندا.
پىكىر قالدىرۋ