جوعارى ءبىلىم بەرۋدى دامىتۋ ۇلتتىق ورتالىعى قانداستاردىڭ قازاقستاندا ءبىلىم الۋىنا ارنالعان ستيپەنديالىق باعدارلاماعا قۇجات قابىلداۋ باستالعانىن حابارلادى. قۇجاتتاردى مامىر ايىنىڭ سوڭىنا دەيىن ونلاين وتكىزۋگە بولادى. بۇل تۋرالى اتالعان ورتالىقتىڭ سايتىندا جاريالاندى.
"قۇرمەتتى ۇمىتكەرلەر، قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى شەتەل ازاماتتارىن، ونىڭ ىشىندە قازاقستان رەسپۋبليكاسىنىڭ ازاماتتارى بولىپ تابىلمايتىن قازاق ۇلتىنىڭ تۇلعالارىن باكالاۆريات، ماگيستراتۋرا مەن PhD ءبىلىم بەرۋ باعدارلامالارى بويىنشا جوعارى وقۋ ورىندارىندا ءبىلىم الۋعا شاقىرادى" دەلىنگەن اقپاراتتا.
بۇل جولى: باكالاۆريات – 490، ماگيستراتۋرا – 50، PhD دوكتورانتۋرا – 10 گرانت ءبولىنىپ وتىر. ستيپەنديالىق باعدارلاماعا شەتەل ازاماتتارى جانە شەتەل ازاماتتارى – قازاقستان رەسپۋبليكاسىنىڭ ازاماتى بولىپ تابىلمايتىن ۇلتى قازاق تۇلعالار قاتىسا الادى.
سونىمەن قاتار ستيپەنديا تەگىن ءبىلىم بەرۋ، اي سايىنعى ستيپەنديا تولەۋدى قامتيتىن بولادى.
قۇجاتتاردى قابىلداۋ مەرزىمى:
-
2024 جىلعى 30 ناۋرىزدان 31 مامىرعا دەيىن
ستيپەنديالىق باعدارلامانىڭ وپەراتورى – ق ر عجبم جوعارى ءبىلىم بەرۋدى دامىتۋ ۇلتتىق ورتالىعى
بارلىق سۇراقتار بويىنشا:
تەل.: +7 (7172) 28 75 26، 28 75 31
E-mail: admission@n-k.kz
پىكىر قالدىرۋ