قازاقستان مۇسىلماندارى ءدىني باسقارماسى قىزمەتكەرلەرى سۋ تاسقىنىنان زارداپ شەككەن قوستاناي وبلىسىنا ارنايى بارىپ، كومەك كورسەتكەنىن حابارلادى.
وبلىسقا بارعان دەلەگاسيا قۇرامىندا قمدب "زەكەت جانە قايىرىمدىلىق" قورىنىڭ ديرەكتورى ماقساتبەك ماقسوت ۇلى، قوردىڭ مامانى ءالي مىرزاقۇلوۆ جانە جاستار ءىسى سەكتورىنىڭ مەڭگەرۋشىسى باعىجان كۇزەكباي جانە ت.ب. قىزمەتكەرلەر بار.
"ولار اۋەلى ارقالىق قالاسىنداعى وبلىستىق جەدەل شتابقا باس سۇعىپ، جۇمىسىمەن تانىستى. سودان سوڭ، ءۇي-جايىن سۋ باسقان تۇرعىندار كوشىرىلگەن جاتاقحاناعا بارىپ، قاجەتتى تۇرمىستىق زاتتاردى جەتكىزدى. سونىمەن قاتار، ەرىكتىلەرگە جاردەمدەسۋ ءۇشىن جانگەلدى اۋدانىنا ات باسىن بۇرىپ، رەزىڭكە ەتىكتەر، ارنايى كيىمدەر، كۇرەكتەر ت.ب. قۇرالداردى تابىستادى" دەلىنگەن ءمۇفتيات حابارلاماسىندا.
پىكىر قالدىرۋ