كەنتاۋلىق تالاپكەر ايدوس قوجانوۆ ۇلتتىق ءبىرىڭعاي تەستىلەۋدەن 138 بالل جيناعان. بۇل - ازىرگە ەلىمىز بويىنشا ەڭ جوعارى كورسەتكىش.

تۇركىستان وبلىسى وڭىرلىك كوممۋنيكاسيالار قىزمەتىنىڭ مالىمەتىنشە، ايدوس حايرۋللا ۇلى 10 جىل بويى №16 يۋريي گاگارين اتىنداعى مەكتەپ-ليسەيىندە وقىپ، 11 سىنىپتا «گرانت» مەكتەبىنە اۋىسقان. ايدوس بولاشاقتا ماتەماتيكا پانىنەن ءمۇعالىم بولعىسى كەلەدى.

تۇركىستان وبلىسىندا بيىل ۇلتتىق ءبىرىڭعاي تەستىلەۋگە قاتىسۋعا 27 340 وقۋشى ءوتىنىم بىلدىرگەن. جالپى وبلىستا 32 306 وقۋشى 11-سىنىپتى تامامداعان. ونىڭ 1727ء-ى - «التىن بەلگىگە»، 2 466 وقۋشى - «ۇزدىك اتتەستاتقا» ۇمىتكەر.

ايتا كەتەرى، ۇبت اياقتالعاننان كەيىن 31 قازانعا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا تالاپكەردىڭ ۇبت ناتيجەلەرى جويىلادى.