جاڭا تۇرعىن ءۇي باعدارلاماسىنا قاتىسۋعا نيەت بىلدىرگەن قازاقستاندىقتار اراسىندا 35 جاسقا دەيىنگى قازاقستاندىقتار كوش باستاپ تۇر. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتىداعى «وتباسى بانكى» اق ديرەكتورى داناگۇل ءتۇسىپوۆا ءمالىم ەتتى.
الماتى، استانا جانە شىمكەنت قالالارىمەن قاتار تۇرعىن ءۇي ساتىپ الۋ ءۇشىن ەڭ كوپ تاڭدالعان بەس قالا مەن ءوڭىر قاتارىنا اقتوبە مەن باتىس قازاقستان وبلىستارى كىردى.
«ناۋرىز» باعدارلاماسى بويىنشا وتىنىمدەر جۇمىس كۇندەرى ساعات 9.00-دەن 21.00-گە دەيىن قابىلدانادى. باسپانا ماركەت پلاتفورماسى (otbasybank.kz) ساعاتىنا ورتا ەسەپپەن 400 ءوتىنىمدى قابىلداۋعا قابىلەتتى.
ونىڭ سوزىنشە، 15 مامىرداعى جاعداي بويىنشا بارلىعى 14 000 جۋىق ءوتىنىم ءساتتى قابىلداندى، ونىڭ ىشىندە الماتى قالاسى بويىنشا 3737 ءوتىنىم. وتىنىمدەردىڭ جارتىسى تۇرعىن ۇيگە كەزەكتە تۇرعان حالىقتىڭ الەۋمەتتىك وسال توپتارىنىڭ وكىلدەرىنەن تۇسكەن.
ال 2 851 ءوتىنىم قابىلدانباي، كەرى قايتارىلدى. نەگىزگى سەبەپ – كليەنتتەردىڭ دەپوزيتتەرىندە 1 ملن تەڭگە مولشەرىندەگى قاجەتتى سوما جوق بولىپ شىققان. بۇل «ناۋرىز» باعدارلاماسىنا قاتىسۋدىڭ نەگىزگى شارتتارىنىڭ ءبىرى. سونداي-اق، تۇرعىن ءۇيى بار ادامداردىڭ دا وتىنىمدەرى قابىلدانبادى.
«جۋىردا عانا «وتاۋ» باعدارلاماسىنا قاتىسۋشىلاردىڭ پۋلىنا كىرگەن 8 000 قازاقستاندىقتىڭ ەسىمدەرى بەلگىلى بولدى. ءقازىر ءبىز ولاردان تولەم قابىلەتتىلىگىن راستاۋ تۋرالى وتىنىمدەرىن قابىلداپ جاتىرمىز. ەكى كۇننىڭ ىشىندە بانكتىڭ 500-گە جۋىق كليەنتى نەسيەگە ماقۇلداۋ الدى. كەلەسى كەزەڭ-باسپانا تاڭداۋ. وسىنداي ءتاسىلدى ءبىز "ناۋرىز" باعدارلاماسىنا دا قولدانامىز. ءقازىر "وتاۋ" باعدارلاماسىنان وتپەگەندەر «ناۋرىز» باعدارلاماسىنا قاتىسۋعا ءوتىنىم بەرە الادى. وندا مۇمكىندىك كوبىرەك بولماق، سەبەبى ءبىز 12000 زاەم بەرۋدى جوسپارلاپ وتىرمىز»، - دەدى «وتباسى بانك» اق الماتى قالاسى فيليالىنىڭ ديرەكتورى داناگۇل ءتۇسىپوۆا.
قاتىسۋشىلاردى دۇرلىكتىرمەۋ ءۇشىن وتىنىمدەردى قابىلداۋ مەرزىمى بارىنشا ۇزارتىلدى. ۇمىتكەرلەردىڭ ماۋسىم ايىنىڭ سوڭىنا دەيىن ءبىر جارىم اي ۋاقىتى بار. سونداي-اق ءوتىنىم بەرۋ كۇنى مەن ۋاقىتى ۇپاي ساناعاندا ەسكەرىلمەيتىن بولادى.
وتىنىمدەردى قابىلداۋ مەرزىمى اياقتالعاننان كەيىن سارالاۋ باستالادى. باعدارلاماعا قاتىسۋشىلار تىزىمىنە ەڭ كوپ ۇپاي جيناعان ۇمىتكەرلەر كىرەتىن بولادى.
وكق سپيكەرى ۇپايلاردىڭ قالاي ەسەپتەلەتىندىگىنە توقتالىپ ءوتتى:
- سالىم بويىنشا سىياقى مولشەرى - ءاربىر 1 000 تەڭگە ءۇشىن 1 ۇپاي؛
- تىركەلگەن نەكەنىڭ بولۋى - 5 ۇپاي؛
- بالالاردىڭ بولۋى - 10 ۇپاي (بالالار سانىنا قاراماستان)؛
- حالىقتىڭ الەۋمەتتىك وسال توپتارى (ءحاوت) مارتەبەسىنىڭ بولۋى - 10 ۇپاي؛
- 35 جاسقا دەيىنگى جاس (قوسا العاندا) – 5 ۇپاي.
ەگەر ەكى قاتىسۋشىنىڭ ۇپايلار سانى سايكەس كەلسە، وندا تىزىمگە ەنگىزۋ كەزىندە باسىمدىق سالىم سوماسى كوپ جانە جيناقتاۋ مەرزىمى ۇزاعىراق ادامعا بەرىلەدى.
سارالاۋدان كەيىن كليەنتتەر بانك سايتىندا «ناۋرىز» باعدارلاماسى بويىنشا ءوتىنىش بەرۋشىلەردىڭ، اتاپ ايتقاندا قاتىسۋشىلار پۋلىنا ەنگەندەردىڭ جانە ۇپايلار بويىنشا وتپەگەندەردىڭ تولىق ءتىزىمىن كورە الادى. سودان كەيىن قاتىسۋشىلاردىڭ نەسيەگە ءوتىنىم بەرۋگە ۋاقىتتارى بولادى.
زاەم بويىنشا وڭ ماقۇلداۋ العان ۇمىتكەردىڭ 2024 جىلدىق جەلتوقسان ايىنىڭ ورتاسىنا دەيىن باسپانا ىزدەپ، ساتىپ الۋىنا ۋاقىتى بولادى.
«ناۋرىز» باعدارلاماسىنىڭ شارتتارى:
- العاشقى جارنا - 20%-دان باستاپ؛
- تۇرعىن ءۇي كەزەگىندە تۇرعان ازاماتتاردىڭ الەۋمەتتىك وسال ساناتتارى ءۇشىن كرەديت بويىنشا مولشەرلەمە - 7% (جتسم 7،3%-دان 8،9% دەيىن)؛
- ازاماتتاردىڭ بارلىق ساناتتارى ءۇشىن كرەديت بويىنشا مولشەرلەمە - 9% (جتسم 9،3%-دان 11،8% دەيىن)؛
- نەسيە مەرزىمى - 19 جىلعا دەيىن.
«ناۋرىز» باعدارلاماسى اياسىندا تۇرعىن ءۇي ساتىپ الۋ بويىنشا كەلەسى شارتتار ۇسىنىلادى:
- العاشقى نارىقتاعى تۇرعىن ءۇي، ونىڭ ىشىندە قتك كەپىلدىگىمەن ۇلەستىك قاتىسۋ شارتى جانە ساقتاندىرۋ قۇرالى بويىنشا؛
- مونوقالالار مەن اۋىلدىق ەلدىمەكەندەردە ەكىنشى نارىقتاعى تۇرعىن ءۇي، جىلىنا بولىنگەن قاراجاتتىڭ جالپى كولەمىنىڭ 30%-نان اسپايتىن كولەمدە.
«زاەمنىڭ الماتى مەن استانا قالالارى ءۇشىن ەڭ جوعارعى مولشەرى - 36 ملن تەڭگەگە، ال قالعان وڭىرلەر ءۇشىن – 30 ملن تەڭگەگە دەيىن»، - دەدى داناگۇل ءتۇسىپوۆا.
سونداي-اق، ءبىر نەسيە اياسىندا ساتىپ الىنىپ جاتقان باستاپقى باسپانانى جوندەۋ جۇمىستارىنا دا اقشا الۋعا دا بولادى. باستىسى جوندەۋگە ارنالعان قارىز سوماسى تۇرعىن ءۇي ساتىپ الۋعا ارنالعان كرەديتتىڭ جالپى سوماسىنىڭ 20%-نان اسپاۋعا ءتيىس، ءبىراق قارىزدىڭ ەڭ جوعارى سوماسى شەگىندە.
باعدارلاماعا قاتىسۋشى پاتەردى باسپانا ماركەت پورتالىنان تاڭداپ، برونداي الادى (otbasybank.kz). بۇل قىزمەت جاڭا تۇرعىن ءۇي باعدارلاماسىنىڭ باستالۋى اياسىندا تۇرعىن ءۇي باعاسىنىڭ جاساندى وسۋىنە جول بەرمەۋگە ارنالعان.
