حالىقارالىق وتباسى كۇنىنە وراي قازاقستان رەسپۋبليكاسىنىڭ مادەنيەت جانە اقپارات مينيسترلىگىنىڭ ۇيىمداستىرۋىمەن ۇلتتىق قۇندىلىقتاردى جاڭعىرتۋعا جانە وتباسى مەن نەكەنىڭ جاعىمدى ۇلگىسىن ناسيحاتتاۋعا، وتباسى مارتەبەسىن ارتتىرۋ ماقساتىندا وتكىزىلەتىن "مەرەيلى وتباسى" ۇلتتىق كونكۋرسىنا 2024 جىلدىڭ 15 مامىرىنان باستاپ ءوتىنىم قابىلداۋ باستالدى. 

كونكۋرسقا قاتىسۋ ءۇشىن وتباسىلار ءوتىنىم ءبىلدىرىپ، ءوزىن-وزى ۇسىنۋ جولىمەن، سونداي-اق جەرگىلىكتى اتقارۋشى ورگانداردىڭ، قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن تىركەلگەن زاڭدى تۇلعالاردىڭ ۇسىنۋى بويىنشا قاتىسا الادى.  قۇجاتتاردى تاپسىرۋ مەرزىمى اعىمداعى جىلدىڭ 15 ماۋسىمىنا دەيىنگى ارالىقتى قامتيدى.

ايتا كەتەيىك، كونكۋرس قازاقستان رەسپۋبليكاسى ۇكىمەتىنىڭ 2014 جىلعى 5 ناۋرىزداعى № 181 قاۋلىسىمەن بەكىتىلگەن "مەرەيلى وتباسى" ۇلتتىق كونكۋرسىن وتكىزۋ قاعيدالارىنا (بۇدان ءارى – قاعيدالار) سايكەس وتكىزىلەدى (قاعيدالارعا ق ر ۇكىمەتىنىڭ 2021 جىلعى 6 مامىرداعى № 306 جانە 2022 جىلعى 16 قاراشاداعى № 904 قاۋلىسىمەن وزگەرىستەر ەنگىزىلدى).

كونكۋرس وتكىزۋءدىڭ نەگىزگى ماقساتى:

1) وتباسى ينستيتۋتىن، ادامگەرشىلىكتى، رۋحاني قۇندىلىقتاردى نىعايتۋ، ەرلى-زايىپتىلار ارسىندا قارىم-قاتىناستىڭ ماڭىزى مەن قۇندىلىقتارىن تانۋ؛

2) اتا-انالاردىڭ بالا تاربيەلەۋدەگى جاۋاپكەرشىلىگىن ارتتىرۋ؛

3) وتباسىلىق قۇندىلىقتاردى، كامەلەتكە تولعان بالالارىنىڭ ەڭبەككە قابىلەتسىز جانە ەگدە جاستاعى اتا-انالارىنا قامقورلىعىن دارىپتەۋ جانە كەڭىنەن ناسيحاتتاۋ؛

4) قازاقستاندىق وتباسىنىڭ جاعىمدى ءيميدجىن ناسيحاتتاۋ

كونكۋرسقا قاتىسۋعا مۇشەلەرىنىڭ ەڭبەكتە، سپورتتا، شىعارماشىلىق، زياتكەرلىك، عىلىمي جەتىستىكتەرى بار، سونداي-اق قوعامدىق پايدالى قىزمەتكە قاتىساتىن (ۆولونتەرلىك، قايىرىمدىلىق، مەسەناتتىق، تالىمگەرلىك) وتباسىلار جىبەرىلەدى.

الايدا:

1) اتقاراتىن قىزمەتى قازاقستان رەسپۋبليكاسىنىڭ اۋماعىندا تىيىم سالىنعان ۇيىمداردىڭ قۇرامىنا كىرەتىن (كىرگەن) مۇشەلەرى بار؛

2) بۇرىن سوتتالعان مۇشەلەرى بار وتباسىلار وكىنىشكە قاراي كونكۋرسقا قاتىسا المايدى.

قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن قازاقستان رەسپۋبليكاسىنىڭ مادەنيەت جانە اقپارات مينيسترلىگى، جەرگىلىكتى اتقارۋشى ورگاندار كونكۋرستىڭ نەگىزگى ۇيىمداستىرۋشىلارى بولىپ تابىلادى. كونكۋرس ەكى كەزەڭدە وتكىزىلەدى. ءبىرىنشى كەزەڭ – اۋداندىق (قالالىق)، ەكىنشى – وبلىستىق كەزەڭ (رەسپۋبليكالىق ماڭىزى بار قالا، استانا).

كونكۋرسقا ءوتىنىم جىبەرگەن وتباسىلار ءتيىستى قۇجاتتاردى وتكىزۋى ءتيىس. 

كوميسسيالار ۇزدىك وتباسىلاردى ايقىنداۋ تۋرالى شەشىم قابىلداۋ كەزىندە مىناداي ولشەمشارتتاردى باسشىلىققا الادى:

      1) وتباسى مۇشەلەرى جەتىستىكتەرىنىڭ سانى مەن ماڭىزى (وتباسى تاريحى ۆيزيت كارتوچكاسى - تانىستىرۋ ءراسىمى)؛

      2) وتباسىلىق داستۇرلەر جانە جادىگەرلەر؛

      3) وتباسىنىڭ رۋحاني-ادامگەرشىلىك كۇندىلىقتارى؛

      4) بالالارىنىڭ جانە نەمەرەلەرىنىڭ جەتىستىكتەرى (بار بولسا)؛

      5) اتا-انالارىنىڭ ۇلگى تۇتارلىق جەتىستىكتەرى؛

      6) وتباسى قۇرامى (وتباسى مۇشەلەرىنىڭ سانى – ءبىر اۋماقتا بىرگە تۇرىپ جاتقان بىرنەشە ۇرپاقتىڭ وكىلدەرى)؛

      7) وتباسىنىڭ دارىندارى؛

      8) وتباسىنىڭ تۇرمىس سالتى (سالاماتتى ءومىر سالتى، بوس ۋاقىتى)؛

      9) قوعامدىق-پايدالى قىزمەتكە (ۆولونتەرلىككە، قايىرىمدىلىققا، مەسەناتتىققا) قاتىسۋى؛

      10) جەتىم بالالارعا قامقورشىلىق، تالىمگەرلىك.