ءتورت جىلدان بەرى ەلوردالىق "استانا جاستارى" جاستار رەسۋرستىق ورتالىعىندا قالالىق ەرىكتىلەر شتابى جۇمىس ىستەيدى. ءقازىر ونىڭ قۇرامىنا التى مىڭنان استام بەلسەندى ەرىكتىلەر كىرەدى. ونىڭ مۇشەلەرى سۋ تاسقىنىنان زارداپ شەككەن وڭىرلەرگە قالاي كومەكتەسكەنى تۋرالى رسك بريفينگىندە شتاب باسشىسى شىڭعىس تىلەۋلين ايتىپ بەردى، دەپ حابارلايدى ەلوردا اكىمدىگىنىڭ رەسمي سايتى.

ەلوردالىق ەرىكتىلەر قاتتى سۋ تاسقىنىنان زارداپ شەككەن قازاقستاندىقتارعا قولدان كەلگەنشە كومەك كورسەتۋدە.

29 ناۋرىز بەن 10 مامىر ارالىعىندا استانادا مەملەكەتتىك ورگانداردىڭ، كاسىپكەرلەردىڭ، ۇكىمەتتىك ەمەس ۇيىمداردىڭ، جەكە تۇلعالار مەن ەرىكتىلەردىڭ كۇشىمەن 1160،5 تونناعا جۋىق گۋمانيتارلىق كومەك جينالدى.

"قالالىق ۆولونتەرلىك شتابتى ۇيلەستىرۋ كەزىندە گۋمانيتارلىق كومەك الىمدارىمەن 10 پۋنكت (الەۋمەتتىك قويمالار) اينالىسادى. جيىنعا 30 ەرىكتىلەر ۇيىمى مەن 500-دەن استام ادام جۇمىلدىرىلدى"، - دەدى تىلەۋلين.

ەلوردا اكىمدىگىنىڭ تىكەلەي ۇيلەستىرۋىمەن 1160،5 توننا گۋمانيتارلىق كومەك كەلەسى وبلىستارعا جىبەرىلدى:

1) اقتوبە وبلىسىنا – 260 توننا.

2) باتىس قازاقستان وبلىسىنا – 216.5 توننا.

3) قوستاناي وبلىسىنا – 246 توننا.

4) قاراعاندى وبلىسىنا – 40 توننا.

5) اتىراۋ وبلىسىنا – 51 توننا.

6) سولتۇستىك قازاقستان وبلىسىنا – 335 توننا.

7) اقمولا وبلىسىنا – 12 توننا.

قاجەتتىلىكتەرگە بايلانىستى ءار ايماققا قاجەتتى تاۋارلار جىبەرىلدى. ولار: ازىق-تۇلىك، بوتەلكەدەگى سۋ، جەكە گيگيەنا قۇرالدارى، سونداي-اق سۋ تاسقىنى ايماقتارىندا جۇمىس ىستەۋ ءۇشىن قاجەتتى جابدىقتار (قايىقتار، گەنەراتورلار، كۇرەكتەر، سومكەلەر، قولعاپتار، شامدار، ارنايى. كيىم جانە ت.ب.).