قازاقستاننىڭ سىرتقى ىستەر مينيسترلىگى "اشىق نقا" پورتالىندا قازاقستان رەسپۋبليكاسى مەن ماروككو كورولدىگىنىڭ ۇكىمەتتەرى اراسىنداعى ۇلتتىق/جالپىازاماتتىق پاسپورتتاردىڭ يەلەرىن ۆيزالىق تالاپتاردان بوساتۋ بويىنشا كەلىسىمگە قول قويۋ تۋرالى قاۋلى جوباسىن قوعامدىق تالقىلاۋعا جاريالاعان.
قوسا بەرىلگەن قۇجاتقا سايكەس، ەكى مەملەكەتتىڭ ءبىرىنىڭ ازاماتتارى قولدانىستاعى ۇلتتىق-جالپىازاماتتىق پاسپورتتاردىڭ نەگىزىندە ەكىنشى تاراپ مەملەكەتىنىڭ اۋماعىنا ۆيزاسىز كىرۋگە، شىعۋعا، ترانزيتكە، ەلدە ۋاقىتشا بولۋعا رۇقسات ەتىلەدى، ەل اۋماعىندا بولۋ مەرزىمىنىڭ ۇزاقتىعى ولار كەلگەن كۇننەن باستاپ 180 كۇننىڭ ىشىندە كۇنتىزبەلىك 30 كۇننەن اسپاۋعا ءتيىس.
"ءبىر تاراپ مەملەكەتىنىڭ ازاماتتارى ەكىنشى تاراپ مەملەكەتىنىڭ اۋماعىنا حالىقارالىق قاتىناستار ارقىلى ساياحاتتاۋشىلارعا ارنالعان اشىق پۋنكتتەر ارقىلى كىرىپ-شىعۋعا جانە ەكىنشى تاراپ مەملەكەتىنىڭ زاڭناماسىن ساقتاۋعا ءتيىس"، - دەلىنگەن كەلىسىمشارت ماتىنىندە. قاۋلى جوباسى 25 ماۋسىمعا دەيىن قوعامدىق تالقىلاۋدا بولادى.
پىكىر قالدىرۋ