2024 جىلعى 1 ماۋسىمداعى جاعداي بويىنشا مەملەكەتتىك الەۋمەتتىك ساقتاندىرۋ قورىنان جۇمىسىنان ايىرىلۋىنا بايلانىستى الەۋمەتتىك تولەم الۋشىلاردىڭ سانى 162،6 مىڭ ادام بولدى.
بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتى حابارلادى. 

"بۇل رەتتە بيىل 110،3 مىڭ ادامعا تولەم العاش رەت تاعايىندالدى. تولەمدەردىڭ جالپى سوماسى 31،8 ميلليارد تەڭگە بولدى. قولدانىستاعى زاڭناما بويىنشا، جۇمىستان بوساتىلعان جۇمىسكەرلەر مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە كەيىنگى 24 ايداعى تابىسىنا بايلانىستى ءبىر ايدان التى ايعا دەيىن جۇمىسىنان ايىرىلۋى بويىنشا الەۋمەتتىك تولەمدەر الادى. تولەم جوعالعان كىرىستىڭ 45%-ىنا دەيىنگى مولشەردە ءماسق قاراجاتى ەسەبىنەن جۇزەگە اسىرىلادى"، – دەلىنگەن حابارلامادا. 

تولەم تاعايىنداۋ ءۇشىن جۇمىستان بوساتىلعان جۇمىسكەرگە:

eGov.kz پورتالىندا اۆتوريزاسيالانۋ؛
«جۇمىسقا ورنالاستىرۋ جانە جۇمىسپەن قامتۋ» بولىمىندە «جۇمىس ىزدەۋشى ادامداردى تىركەۋ» قىزمەتىن تاڭداۋ؛
ونلاين-قىزمەتكە تاپسىرىس بەرىپ، بارلىق جولدى تولتىرۋ جانە وعان ەسق-مەن قول قويىپ، ءوتىنىمدى جىبەرۋ قاجەت؛
ءبىر كۇن ىشىندە تۇرعىلىقتى جەرىڭىزدەگى مانساپ ورتالىعى (بۇدان ءارى – مو) بوس جۇمىس ورىندارىن ۇسىنادى؛
ەگەر جۇمىس تابىلماسا، ءۇش جۇمىس كۇنى ىشىندە قاشىقتىقتان جۇمىسسىز مارتەبەسى بەرىلەدى (قاجەت بولعان جاعدايدا سىزگە مو قىزمەتكەرى قوسىمشا اقپارات جيناۋ ءۇشىن حابارلاسادى)؛
بۇل قىزمەتتى ونلاين رەجيمىندە ەلەكترون ەڭبەك بيرجاسى (enbek.kz) ارقىلى دا الۋعا بولادى.

جۇمىسسىز رەتىندە تىركەلۋ تۋرالى مالىمەتتەر بولعان كەزدە ەڭبەك مينيسترلىگىنىڭ اقپاراتتىق جۇيەسى پرواكتيۆتى فورماتتا ماسق-تەن تولەمدى تاعايىنداۋ بويىنشا قىزمەت كورسەتۋگە كەلىسۋ ءۇشىن موبايل تەلەفونعا SMS-حابارلاما جىبەرەدى.
كەلىسكەن جاعدايدا SMS-حابارلاماعا جاۋاپ بەرۋ قاجەت. تولەم اۆتوماتتى تۇردە تاعايىندالادى.