الەۋمەتتىك جەلىلەردە الماتىداعى نارحوز ۋنيۆەرسيتەتىنىڭ قازاق تىلىندە ءبىلىم بەرۋدەن باس تارتقانى تۋرالى اقپارات تارادى.
بۇل تۋرالى جۋرناليست دياس نۇراقىن الەۋمەتتىك جەلىدەگى پاراقشاسىندا جازعان. ءجۋرناليستىڭ ايتۋىنشا، وقۋ ورنىنىڭ ەڭ نەگىزگى ءتورت فاكۋلتەتىنىڭ قازاقشا، ورىسشا توپتارى جابىلعان.
“الماتىداعى نارحوز ۋنيۆەرسيتەتى قازاق تىلىنەن باس تارتىپتى. وقۋ ورداسىنداعى ەڭ نەگىزگى دەگەن ءتورت فاكۋلتەتتىڭ قازاقشا، ورىسشا توپتارى جابىلدى. اتاپ ايتقاندا ەكونوميكا، قارجى، بۋحگالتەرلىك ەسەپ، قارجىلىق تاۋەكەل مەنەدجمەنت، بيزنەستەگى اقپاراتتىق تەحنولوگيا ماماندىقتارى بويىنشا ءبىلىم الامىن دەگەندەر ەندى تەك اعىلشىنشا سايراۋى كەرەك. بىلتىر بۇل ماماندىقتار بويىنشا قازاقشا بىردە-بىر توپ بولماعان. بيىل دا “قازاقتاردى” قابىلدامايمىز دەپ شەشىم قابىلداپتى”، – دەلىنگەن جازبادا.
جۋرناليست ۋنيۆەرسيتەتتىڭ بۇل ارەكەتىن قازاق تىلىنە جاسالعان قاستاندىق دەپ سانايدى.
“بۇل – بارىپ تۇرعان باسسىزدىق. قازاق ءتىلىن قۇرتۋدىڭ توتە جولى. سەبەبى دۇنيەجۇزى سويلەيتىن تىلدە ساباق بەرەمىز دەگەن سىلتاۋمەن قازاق ءتىلىن تۇقىرتىپ وتىر. نارحوز-عا نەگىزىنەن اۋىل بالالارى كەلىپ وقيدى. اعىلشىنشانى ەمەس، ورىسشانى ارەڭ تۇسىنەتىن جاستاردىڭ ساناسىن دا، ءتىلىن دە قويىرتپاقتاپ جاتىر دەۋگە نەگىز بار. بيىلعى قۇرىلتايدا پرەزيدەنت قازاق ءتىلىن مەڭگەرگەندەر 70 پايىزدان استى دەپ ايتتى. ال پرەزيدەنت اكىمشىلىگىنىڭ باسشىسى ايبەك دادەبايەۆ قازاقشا سويلەيتىندەر سانى 81 پايىزعا تەڭ دەپ سۇحبات بەرگەنى ەسىمىزدە. ەندەشە قازاق ەلىندە، قازاقتىڭ جەرىندە نارحوز-دىڭ قازاقشا وقىتپايمىز دەگەنى قاي ساسقانى؟ بۇل قازاقتاردىڭ قۇقىعىن تاپتاۋ ەمەي نەمەنە؟” – دەيدى جۋرناليست.
جەلىدە تاراعان اقپاراتقا قاتىستى ۋنيۆەرسيتەت باسشىلىعى مالىمدەمە جاسادى.
“نارحوز ۋنيۆەرسيتەتىندەگى وقۋ جوسپارىنا سايكەس، ستۋدەنتتەر قازاق، ورىس نەمەسە اعىلشىن تىلدەرىندە پاندەردى تاڭدايدى. ءبىز ستۋدەنتتەرگە ءوز قالاۋىن تاڭداۋىنا جانە نازار اۋدارۋعا مۇمكىندىك بەرەمىز. بۇگىندە كوپتەگەن ۋنيۆەرسيتەت ستۋدەنتتەرى كوپتەگەن پاندەردى اعىلشىن تىلىندە وقۋدى تاڭدايدى. ويتكەنى اعىلشىن ءتىلىن جاقسى مەڭگەرۋ ولارعا جاھاندىق ءبىلىم بازاسىنا قول جەتكىزۋگە مۇمكىندىك بەرەدى. ءقازىر الەمدە عىلىمي ءبىلىمنىڭ 90 پايىزدان استامى اعىلشىن تىلىندە شىعارىلادى. بۇل كوزقاراس ۋنيۆەرسيتەتتىڭ تەك قازاقستاندا عانا ەمەس، سونىمەن قاتار شەتەلدە دە سۇرانىسقا يە تۇلەكتەردى دايىنداۋعا باعىتتالعان ميسسياسىنان كورىنەدى”، – دەلىنگەن ۋنيۆەرسيتەت حابارلاماسىندا.
پىكىر قالدىرۋ