پاۆلودار وبلىسى بويىنشا ەكونوميكالىق تەرگەپ-تەكسەرۋ دەپارتامەنتى ەڭ ءقاۋىپتى ءارى كۇدىكتى قارجىلىق وپەراسيالاردى تالداي كەلىپ، 30 قىلمىستى انىقتاعان.
بۇل زاڭبۇزۋشىلىقتار بويىنشا قىلمىستىق جاۋاپكەرشىلىك ق ر قىلمىستىق كودەكسىنىڭ 216-بابىندا ايقىن كورسەتىلگەن. كەلگەن زالال 6 ميلليارد تەڭگەدەن اسقان.
ونىڭ 300 ميلليون تەڭگەسى تەرگەۋ پروسەسى كەزىندە وتەلدى.
— رەسەيدە وندىرىلگەن استىقتى ۇلكەن كولەمدە ەلگە اكەلىپ، جالعان شوت-فاكتۋرا جاساۋ ارقىلى تاياۋ شىعىس ەلدەرىنە قازاقستاندىق ءونىم رەتىندە ەكسپورتقا شىعارىپ جاتقاندار انىقتالدى. ولار ءونىمدى كوبىنە اۋعانستان، يران، تاجىكستان سياقتى مەملەكەتتەرگە جىبەرەدى. بۇل ءبىزدىڭ وتاندىق ەكونوميكامىزعا، ءوڭىرىمىزدىڭ شارۋا قوجالىقتارىنا ايتارلىقتاي زيان كەلتىرىپ وتىر. ءوزىمىزدىڭ ونىمدەرىمىز شەتەلگە شىقپاي قالادى نەمەسە ساتىلعان كۇندە دە باعاسى تومەندەپ كەتەدى. سوندىقتان دا مۇنداي زاڭسىز ىس-ارەكەتتەر ءبىزدىڭ ۇلتتىق ەكونوميكامىزعا ۇلكەن زالال كەلتىرەدى، — دەيدى پاۆلودار وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ باسشىسى ەرىك ەسەنوۆ.
پىكىر قالدىرۋ