تولەبي اۋدانىندا كارەر جۇمىسشىسى تىرىدەي ورتەنىپ كەتكەن. مارقۇمنىڭ تۋىستارى تەرگەۋ جۇمىسىنىڭ باياۋ ءجۇرىپ جاتقانىن ايتادى. ولار جۇمىس بەرۋشىلەردىڭ نەمقۇرايلىعىنا دا نارازىلىق تانىتتى. 

وtyrar.kzء-تىڭ جازۋىنشا، قارلىعاش سەربايەۆا وسىدان 13 كۇن بۇرىن ۇلىن جەر قوينىنا تاپسىردى. 44 جاستاعى قۋانىش سەربايەۆ ەكى جىلدان بەرى تولەبي اۋدانى اقباستاۋ اۋىلىنداعى كارەردە جۇمىس ىستەگەن. الايدا 11 ماۋسىم كۇنى جۇك كولىگىنە تاس تيەپ كەلە جاتقان جۇرگىزۋشى جولدا اۋدارىلىپ، كولىكپەن بىرگە ورتەنىپ كەتكەن.

«الدىمدا جۇرگەن بالام دەم اراسىندا جوق بولىپ كەتتى، ءبىر سەكۋندتىڭ ىشىندە. ول قالاي بولعانى؟ تەحنيكالىق قاۋىپسىزدىك دەگەن جوق. ازاننان كەشكە دەيىن سول ماشينانى قايتا-قايتا جوندەي بەرەدى. تۇنىمەن-كۇنىمەن اۋىسىمدى جۇمىستا. ءبىر كەدەرگى بولدى عوي. ايتپەسە بۇل بالام ماشينانى بەسكە بىلەدى. قانشا جىلدان بەرى ايداپ كەلە جاتقان. سوندىقتان ولارعا باستارىن الا قاشۋدىڭ قاجەتى جوق»، – دەيدى مارقۇمنىڭ اناسى قارلىعاش سەربايەۆا.

جۇمىسقا ساۋ كەتىپ، كۇلگە اينالعان سۇيەگى كەلگەن قۋانىشتىڭ ارتىندا ەكى قىزى مەن ايەلى قالدى. بىرنەشە جىل بۇرىن اۋىر دەرتكە شالدىققان جۇبايى ءقازىر الماتىدا ەم الىپ جاتىر. مارقۇمنىڭ اكەسى جۇمىس بارىسىندا جان تاپسىرعان ۇلىنىڭ وتباسىنا ەڭ قۇرىعاندا وتەماقى بەرىلۋىن سۇرايدى.

ۇيلەنگەلى جالدامالى پاتەردە تۇرىپ كەلگەن مارقۇمنىڭ وتباسى تەك سوڭعى جىلدارى اۋىل ماڭىنان ءۇي سالۋدى باستاعان. ءبىراق، ونى دا اياقتاپ ۇلگەرمەدى. ال، جۇمىس بەرۋشىلەر وندىرىستە ءجۇرىپ اجال قۇشقان قۋانىشتىڭ وتباسىنا جاردەم بەرىلۋى تەك ساراپتامادان كەيىن بەلگىلى بولادى دەپ وتىر.

«قۋانىش اعا «كۋاري سەرۆيس» كەلگەلى ىستەيدى. ءوز ىسىنە تياناقتى كىسى بولعان. جۇمىسقا جاۋاپكەرشىلىگى بار. وتە ۇقىپتى كىسى بولعان. بۇنى ەندى ساراپتاما انىقتار. بىلمەيمىن قالاي بولعانىن. جاۋاپ بەرە المايمىن ءسوزدىڭ اشىعى»، – دەيدى تاۋ-كەن سەحىنىڭ باسشىسى ماقسات ايتقۇل.

ءقازىر بۇل ىسكە قاتىستى ەڭبەك قاعيدالارىن بۇزۋ بابىمەن تەرگەۋ باستالدى.