10 ادامعا ۇكىمدى الماتى قالاسىنىڭ المالى اۋداندىق سوتى شىعاردى. قىلمىسقا قاتىستى سوتقا دەيىنگى تەرگەپ-تەكسەرۋدى كولىك پروكۋراتۋراسى جۇرگىزگەن.
“سوت تالقىلاۋى بارىسىندا ايىپتاۋ جاعى سوتتالۋشىلاردىڭ "مەتروپوليتەن" كمك، "الماتىمەتروقۇرىلىس" اق، "اۆتوماتتاندىرۋ جانە تەحنولوگيالار قىزمەتى" ج ش س باسشىلارى بولا وتىرىپ، ادامدار توبىمەن، 2018 جىلدىڭ ماۋسىمىنان 2020 جىلدىڭ تامىزىنا دەيىنگى كەزەڭدە "سارىارقا" جانە "دوستىق" ستانسالارىن سالۋ بارىسىندا قارجى الاياقتىعىمەن، ونىڭ ىشىندە جابدىقتىڭ قۇنىن ارتتىرىپ (ءىس جۇزىندە 10 ەسە)، تۇراقتى تۇردە ءىرى كولەمدە اقشالاردى جالعان فيرمالار ارقىلى شىعارعانىن دالەلدەدى.
سوتتالعاندار مەملەكەتتىك جانە قارجى ۇيىمدارىندا جۇمىس ىستەۋ قۇقىعىنان ايىرىلا وتىرىپ، ءارتۇرلى مەرزىمگە باس بوستاندىعىنان ايىرىلدى (نەگىزگى فيگۋرانتتار 7 جىلدان 8 جىلعا دەيىن). سونىمەن قاتار سوت 1 ميلليارد تەڭگەدەن استام سوماعا تىيىم سالىنعان مۇلىكتى تاركىلەۋدى قولدانىپ، مەملەكەتكە كەلتىرىلگەن شىعىندى ءوندىردى”، – دەلىنگەن حابارلامادا.
سوت ۇكىمى زاڭدى كۇشىنە ەنگەن جوق.
پىكىر قالدىرۋ