ۇكىمەت وتىرىسىنىڭ قورىتىندىسى بويىنشا وتكەن بريفينگتە سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ ۆەدومستۆونىڭ قازاقستاننىڭ عارىش سالاسىن قالاي دامىتۋدى جوسپارلاپ وتىرعانىن ايتتى، دەپ حابارلايدى Qamshy.kz اقپارات اگەنتتىگى.
«عارىش سالاسى ەل ءۇشىن وتە ماڭىزدى. سوندىقتان، جۇمىسىمنىڭ ءبىرىنشى ايىندا بايقوڭىر عارىش ايلاعىنا بارىپ، جۇك زىمىرانىن ۇشىرۋعا قاتىستىم. مەن تۋريستەردى تارتۋ تۇرعىسىنان ۇلكەن الەۋەتتى (سالانى دامىتۋ - رەد.) كورەمىن، عارىش اكتيۆتەرىن شوعىرلاندىرۋ الەۋەتىن كورەمىن... بىزدە تىگىنەن ينتەگراسيالانعان حولدينگ نەمەسە كورپوراسيا قۇرۋ مۇمكىندىگى بار، ويتكەنى بىزدە ءوز عارىش ايلاعى مەن قۇراستىرۋ-سىناۋ كەشەنى بار»، - دەپ ناقتىلادى ول.
جاسلان مادييەۆ قازاقستاننىڭ ءوز سەرىكتەرى بار ەكەنىن ايتتى. بۇگىنگى تاڭدا R&D باستاپقى كەزەڭىندە جاڭا جوبا جۇرگىزىلۋدە.
"ول ءالى دە ءوندىرىس بويىنشا عىلىمي-زەرتتەۋ جانە تاجىريبەلىك-كونسترۋكتورلىق جۇمىستار ساتىسىندا ورنالاسقان. سوندىقتان ونى ودان ءارى دامىتۋعا گرانتتار تارتامىز. ءبىز قازاقستاننىڭ وسىنداي تىك قۇرىلىمدى قالىپتاستىرۋدىڭ ۇلكەن الەۋەتى بار ەكەنىن كورىپ وتىرمىز"، - دەپ اتاپ ءوتتى مينيستر.
ول سالانى تۋريستەردى تارتۋ ەسەبىنەن دامىتۋ جوسپارلانىپ وتىرعانىن ءتۇسىندىردى.
"بىزدە تاپسىرىستاردى تارتۋ جوسپارلارى بار... ءبىز جوبانى تۋريستىك تارتىمدى فورماتقا كەلتىرۋ ءۇشىن ءبىرقاتار ينۆەستورلارمەن سويلەسەمىز. Astana Hub تارتا وتىرىپ، عارىش سالاسىنىڭ اينالاسىندا ستارتاپ-ەكوجۇيەنى دامىتقىمىز كەلەدى. كوپتەگەن جەكە كومپانيالار قىزىعۋشىلىق تانىتۋدا"، - دەدى ول.
بۇدان بولەك، مينيستر ۆەدومستۆو نارىقتى پايدالانۋعا مۇمكىندىك بەرۋى ءتيىس ەكەنىن اتاپ ءوتتى.
"ءبىز نارىققا وسى دەرەكتەردى پايدالانۋعا مۇمكىندىك بەرۋىمىز كەرەك، وسىلايشا ستارتاپتار مەن ينتەرپرەنەرلەر وسى دەرەكتەردى پايدالانا الادى جانە كەيبىر تەحنولوگيالىق شەشىمدەر ۇسىنادى. عارىشتى دامىتقان ءجون، ويتكەنى سول سپۋتنيكتەردەن الۋعا بولاتىن ونىمدەردى ەكونوميكانىڭ باسقا سالالارىندا كروسس-سەكتورلاردا قولدانۋعا بولادى. بۇل ورتتەرگە اكەلەتىن جىلۋ نۇكتەلەرىن بولجاۋ جانە انىقتاۋ، مۇناي سالاسىنداعى، اۋىل شارۋاشىلىعىنداعى سۋ تاسقىنى جاعدايلارىن بولجاۋ جانە مودەلدەۋ بويىنشا ءارتۇرلى كەيستەر"، - دەپ تۇيىندەدى ءسدياوم باسشىسى.
پىكىر قالدىرۋ