قازاقستانداعى جوعارى وقۋ ورىندارىنداعى وقۋ اقىسى ءقازىردىڭ وزىندە ارزان ەمەس. ۇلتتىق ۋنيۆەرسيتەتتەردە باعا شارىقتاپ تۇر. جاڭا وقۋ جىلىندا اقىلى وقۋ قۇنى تاعى قىمباتتاۋى مۇمكىن بە؟ - دەپ سۇرادى ب ا ق وكىلدەرى.

– نەگىزگى ماسەلە – وقۋ ساپاسىن كوتەرۋ. ءبىز كەلەسى جىلدان باستاپ بەرىلگەن مەملەكەتتىك گرانتتاردىڭ سوماسىن ۇلعايتىمىز. ۇلتتىق ۋنيۆەرسيتەتتەردە بيىل جىلىنا 1،2 ملن تەڭگە بولسا، جالپى مەملەكەتتىك، وڭىرلىك ۋنيۆەرسيتەتتەردە 900 مىڭ تەڭگەنىڭ ماڭايىندا. بۇل – مەملەكەتتىك گرانتتىڭ قۇنى. بۇل اقشا جەتكىلىكسىز. بىلاي ەسەپتەپ كورسەك، 2 مىڭ دوللاردىڭ شاماسىندا، ياعني، ءبىر بالانى ءبىر جىل جوعارى ءبىلىم جۇيەسىندە وقىتۋ ءۇشىن ءبىز 2 مىڭ دوللاردان جۇمسايمىز. ءبىلىم ساپاسى سول – 2 مىڭ دوللاردىڭ ساپاسى. سوندىقتان ءقازىر گرانتتاردىڭ قۇنىن ۇلعايتامىز، ءبىراق اقىلى تۇسكەن بالالارعا قولداۋ رەتىندە ونى رەتتەپ وتىرمىز، – دەدى مينيستر ساياسات نۇربەك.

جوعارى ءبىلىم مينيسترلىگىنىڭ باسشىسى بيىل قوسىمشا 4 قۇرال ەنگىزىلەتىنىن جەتكىزدى.

– بىرىنشىدەن، اقپان ايىنان «ۇلتتىق قور – بالالارعا» دەگەن قۇرال باستالدى. ءار بالاعا وسى جىلدان باستاپ ارنايى شوتتار اشىلدى، ۇلتتىق قوردان تۇسكەن پايدا سول شوتتارعا جيناقتالادى. ەكىنشىسى – «كەلەشەك» جيناقتاۋشى جۇيە. ونى وسى جىلدىڭ سوڭىندا باستايمىز. ءۇشىنشىسى – جەڭىلدەتىلگەن نەسيەلەر، ونى دا وسى جىلدىڭ سوڭىنا دەيىن جوبا رەتىندە باستايمىز. ءتورتىنشىسى – سارالانعان گرانت جۇيەسى. ەندى جوعارى بالل العان، ءبىراق ءوزىنىڭ تاڭداعان ماماندىعىنا تۇسە الماعاندارعا 50%-75%-عا دەيىن سارالانعان گرانتتار بەرەمىز. اقىلى وقۋ قۇنىن رەتتەپ، ۇستاپ تۇرامىز. تەك قانا ۋنيۆەرسيتەتتەرگە ينفلياسيانىڭ يندەكساسياسىنا رۇقسات بەرەمىز، – دەپ ءتۇسىندىردى ول.