5 كۇدىكتى قاماۋعا الىندى.

ۇلتتىق قاۋىپسىزدىك كوميتەتى استانا قالاسىندا، الماتى جانە باتىس قازاقستان وبلىستارىندا قازاقستاننىڭ 5 ازاماتى ۇستالىپ، سوت سانكسياسىمەن قاماۋعا الىندى، دەپ حابارلادى ۇقك باسپا ءسوز قىزمەتى.
تەرگەۋ نۇسقاسى بويىنشا ولار تەررورلىق ارەكەتتەردى ۇيىمداستىرۋ ماقساتىندا تەرروريزمدى ناسيحاتتاۋعا، ءدىني الاۋىزدىقتى قوزدىرۋعا جانە ادامداردى تارتۋعا قاتىسقان.

"تۇرعىلىقتى جەرلەرىن ءتىنتۋ كەزىندە قارۋ-جاراق، وق-دارىلەر، ءدىني ادەبيەتتەر جانە وزگە دە زاتتاي دالەلدەمەلەر الىندى"  دەپ جازىلعان حابارلامادا.

ايتا كەتەيىك، كۇدىكتىلەردىڭ ەكەۋى كىسى ءولتىرۋ، توناۋ جانە بۇزاقىلىق ءۇشىن بۇرىن سوتتالعان. تاعى بىرەۋى لاڭكەستەردىڭ شەتەلدىك لاگەرلەرىندە دايىندىقتان ءوتىپ، شەت مەملەكەت اۋماعىندا قارۋلى قاقتىعىستارعا قاتىسقان.
قىلمىستىق كودەكستىڭ 174، 256، 259-باپتارى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر.
قىلمىستىق-پروسەستىك كودەكستىڭ 201-بابىنىڭ 1-بولىگىنە سايكەس وزگە اقپارات جاريا ەتىلمەيدى.