مەملەكەت باسشىسى قاسىم-جومارت توقايەۆ وسىدان ءبىر جىل بۇرىنعى قازاقستان حالقىنا جولداۋىندا بالالاردىڭ قاۋىپسىزدىگىن قامتاماسىز ەتۋ مەن ولارعا ساپالى ءبىلىم بەرۋدە وقۋ-اعارتۋ مينيسترلىگىنە ءبىرقاتار تاپسىرما بەرگەن بولاتىن. پرەزيدەنتتىڭ قانداي تاپسىرماسى ءبىر جىلدىڭ ىشىندە جۇزەگە استى. جولداۋداعى ايتىلعان تاپسىرمالار قالاي ورىندالدى؟ ايتىلعان ءسوز جۇزەگە استى ما؟ Qamshy.kz اقپارات اگەنتتىگى وسى سۇراقتىڭ جاۋابىن ىزدەپ كوردى.
زورلىق-زومبىلىق قۇربانىن قورعاۋ
ايتىلدى:
مەملەكەت باسشىسى قاسىم-جومارت توقايەۆ 2023 جىلعى 1 قىركۇيەكتەگى «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا زورلىق-زومبىلىق پەن بۋللينگ قۇرباندارىنا پارمەندى كومەك باعدارلاماسىن ازىرلەۋدى تاپسىردى.
ورىندالدى:
1) وقۋ-اعارتۋ مينيسترلىگى زورلىق-زومبىلىققا، قاتىگەزدىكپەن قاراۋعا، بۋللينگكە ۇشىراعان كامەلەتكە تولماعاندارعا، سونداي-اق ولاردىڭ كوزىنشە جەكە ادامعا قارسى قۇقىق بۇزۋشىلىقتار جاسالعان كامەلەتكە تولماعاندارعا كومەك كورسەتۋ باعدارلاماسىن ازىرلەدى، وعان بالالارعا كومەك كورسەتۋ الگوريتمى، سونداي-اق كامەلەتكە تولماعانداردىڭ قاجەتتىلىكتەرىن باعالاۋ نەگىزىندە كوزدەلگەن كومەك تۇرلەرىنىڭ كەشەنى (مەديسينالىق، پسيحولوگيالىق، پەداگوگيكالىق، الەۋمەتتىك، قۇقىقتىق) كىرەدى.
2) پسيحولوگيالىق كومەك كورسەتۋدىڭ ەرەكشەلىكتەرىن ەسكەرە وتىرىپ، زورلىق-زومبىلىققا ۇشىراعان نەمەسە كۋا بولعان كامەلەتكە تولماعانداردى ەرتە انىقتاۋ جانە ولارعا كومەك كورسەتۋ بويىنشا ادىستەمەلىك ۇسىنىمدار ازىرلەندى.
«سيفرلىق ءمۇعالىم» جوباسى
ايتىلدى:
پرەزيدەنت الەۋمەتتىك وسال وتباسىلاردان شىققان بالالارعا ارنالعان «سيفرلىق ءمۇعالىم» جوباسىن ىسكە اسىرۋدى تاپسىردى.
ورىندالدى:
ءبىلىم بەرۋ ۇيىمدارىندا 2024 جىلدىڭ قىركۇيەگىندە «سيفرلىق ءمۇعالىم» جاڭا جوباسى باستالادى؛
- بۇل جوبا الەۋمەتتىك وسال توپتاردان شىققان وقۋشىلارعا قورىتىندى ەمتيحاندارعا دايىندالۋدا قولداۋ كورسەتۋگە باعىتتالعان؛
- وقۋشىلارعا سيفرلىق وقۋ ماتەريالدارى مەن قوسىمشا ساباقتارعا قولجەتىمدىلىك بەرىلەدى؛
- وسى ماقساتتا الەۋمەتتىك وسال وتباسىلاردان شىققان بالالارعا ارنالعان «سيفرلىق ءمۇعالىم» جوباسىن ىسكە اسىرۋ بويىنشا جول كارتاسى ازىرلەندى؛
- جوبا بويىنشا ەل اۋماعىندا 2000-گە جۋىق وقۋشى قامتىلادى.
مەكتەپكە دەيىنگى تاربيەگە ءمان بەرىلۋ كەرەك
ايتىلدى:
مەملەكەت باسشىسى 2 جاستان 6 جاسقا دەيىنگى بالالاردى ساپالى مەكتەپكە دەيىنگى تاربيەمەن جانە وقىتۋمەن قامتاماسىز ەتۋ جونىندە شارالار كەشەنىن قابىلداۋدى تاپسىردى.
ورىندالدى:
- مەكتەپكە دەيىنگى ءبىلىم بەرۋ ۇيىمدارىندا بيىلدىڭ باسىنان بەرى 27 مىڭعا جۋىق جاڭا ورىن اشىلدى؛
- مەكتەپكە دەيىنگى ۇيىمدارعا بارمايتىن بالالاردىڭ اتا-انالارىنا ارنالعان كونسۋلتاسيالىق پۋنكتتەر جەلىسى كەڭەيتىلۋدە، 2024 جىلدىڭ سوڭىنا دەيىن ولاردىڭ سانى 5000-عا جەتەدى؛
- مەكتەپكە دەيىنگى ۇيىمدار مەن باستاۋىش مەكتەپتىڭ جۇمىسىنداعى ساباقتاستىقتى قامتاماسىز ەتۋ ماقساتىندا بالانىڭ جەكە دامۋ كارتاسى سيفرلىق فورماتقا كوشىرىلدى جانە باستاۋىش سىنىپ مۇعالىمدەرىنە ۇبدق بازاسىندا قولجەتىمدى بولادى.
مەكتەپ سانىن ارتتىرۋ
ايتىلدى:
پرەزيدەنت قاسىم-جومارت توقايەۆ شاعىن قالالارداعى، اۋدان ورتالىقتارى مەن اۋىلدارداعى مەكتەپتەردى جىل سايىن جاڭعىرتۋدى (كۇردەلى جانە اعىمداعى جوندەۋ، كىتاپحانالار، اسحانالار، جيھاز، قاۋىپسىزدىك ماسەلەسى) تاپسىردى.
ورىندالدى:
شاعىن قالالاردا، اۋدان ورتالىقتارىندا جانە ەلىمىزدىڭ 17 ءوڭىرىنىڭ اۋىلدارىندا ورنالاسقان 1000 مەكتەپتى جاڭعىرتۋعا جەرگىلىكتى بيۋدجەتتەن 68 ملرد. تەڭگە ءبولىندى. وندا 367 مىڭعا جۋىق وقۋشى وقيدى.
شاعىن قالالار مەن اۋىلداردىڭ 1000 مەكتەبىن جاڭعىرتۋ كەلەسى باعىتتار بويىنشا جوسپارلانۋدا:
- 706 مەكتەپتە كۇردەلى جانە اعىمداعى جوندەۋ جۇمىستارى؛
- 526 مەكتەپتى پاندىك كابينەتتەرمەن جاراقتاندىرۋ؛
- 537 مەكتەپتە مەكتەپ جيھازىن جاڭارتۋ؛
- 442 مەكتەپتەگى اسحانالاردى جاڭعىرتۋ؛
- 670 مەكتەپتە كىتاپحانالاردى جاڭارتۋ؛
- 420 مەكتەپتە قاۋىپسىزدىك شارتتارىن ارتتىرۋ.
وقۋ ماتەريالدارىن سيفرلىق فورماتقا كوشىرۋ
ايتىلدى:
پرەزيدەنت پاندەردى وقىتۋدىڭ يننوۆاسيالىق تاسىلدەرىن ەنگىزۋ، قاجەتتى وقۋ ماتەريالدارىن سيفرلىق فورماتقا كوشىرۋدى تاپسىردى.
ورىندالدى:
بۇگىنگى تاڭدا مەكتەپ وقۋلىقتارىنىڭ 95،5%-ى سيفرلىق فورماتقا اۋىستىرىلدى. ولار مەملەكەتتىك ساراپتامادان ءوتىپ، وقۋ-ادىستەمەلىك كەشەندەر تىزىمىنە ەنگىزىلدى. ساندىق فورماتتاعى وقۋلىقتار ەلىمىزدەگى 13 باسپانىڭ 11 پلاتفورماسىندا قول جەتىمدى.
قازاقستان رەسپۋبليكاسى پرەزيدەنتىنىڭ سايلاۋالدى باعدارلاماسىن ىسكە اسىرۋ بارىسىندا 2023 جىلى 1507 پاندىك كابينەت ساتىپ الىنىپ، جوسپاردىڭ ورىندالۋى 100%-عا جەتتى.
2024 جىلى ەلىمىزدىڭ 700-دەن استام مەكتەبىندە 1206 زاماناۋي روبوتوتەحنيكا، حيميا، بيولوگيا، فيزيكا، STEM پاندىك كابينەتتەرىن اشۋ جوسپارلانعان.
پىكىر قالدىرۋ