كاليفورنيا ۋنيۆەرسيتەتىنىڭ زەرتتەۋشىسى دجەيسون ناگاتا باستاعان عالىمدار توبى 1985 جىلدان بەرى ەلەكتروندى قۇرىلعىلاردىڭ ادام دەنساۋلىعىنا قالاي اسەر ەتەتىنى بويىنشا جۇرگىزگەن زەرتتەۋىنىڭ ناتيجەلەرىن جاريالادى. زەرتتەۋ بارىسىندا 4 مىڭنان استام جاستىڭ ءومىرى مەن دەنساۋلىعى باقىلاۋعا الىنعان.

زەرتتەۋ ناتيجەلەرى 20 جاسقا دەيىن ەكران الدىندا وتكىزگەن ءاربىر ساعات ونىڭ 60 جاسقا دەيىن ءومىر ءسۇرۋ مۇمكىندىگىن ازايتاتىنىن كورسەتكەن. بۇل ءقاۋىپ، اسىرەسە، ەرلەر اراسىندا جوعارى. 

"ورتا جاستان جاعداي ودان سايىن كۇردەلەنە تۇسەدى. تاۋلىك ىشىندەگى ەكران الدىنداعى ءاربىر ساعات جۇرەكتىڭ يشەميالىق اۋرۋلارى پايدا بولۋ ءقاۋپىن 55 پايىزعا، ينسۋلت ءقاۋپىن 58 پايىزعا، جالپى جۇرەك اۋرۋلارى ءقاۋپىن 32 پايىزعا ارتتىرادى"، – دەلىنگەن زەرتتەۋدە. 

سونداي-اق، دجەيسون ناگاتا جاس كەزدە سمارتفون الدىندا كوپ وتىرۋ ادەتى ادامدىڭ فيزيكالىق بەلسەندىلىگىن تومەندەتىپ، ۇيقى رەجيمىن بۇزاتىنىن ايتادى جانە بۇل ادەت ادامدا ءومىرىنىڭ سوڭىنا دەيىن ساقتالىپ قالادى.

سوندىقتان، زەرتتەۋشىلەر، جۇمىستان تىس ۋاقىتتا ەلەكتروندىق قۇرىلعىلاردى تاۋلىگىنە ەكى ساعاتتان ارتىق قولدانباۋعا، جاتار الدىندا ەكرانعا تەلمىرۋدەن مۇلدە ارىلۋعا كەڭەس بەرەدى.

دەرەككوز: informburo.kz