الماتى وبلىسىندا ينۆەستورلار ءۇشىن قولايلى جاعداي جاساۋعا كوپ كۇش جۇمسالىپ جاتىر. وسى باستامالار اياسىندا ايماقتا جالپى اۋدانى 1370 گەكتار بولاتىن ءتورت يندۋستريالىق ايماق قۇرىلىپ، وندا ەكسپورتقا باعىتتالعان وندىرىستەردى ورنالاستىرۋ جوسپارلانعان.

وبلىس اۋماعىندا جالپى اۋدانى 96،6 مىڭ گەكتار «الاتاۋ» ارنايى ەكونوميكالىق ايماعى جۇمىس ىستەيدى. ارنايى ەكونوميكالىق ايماقتىڭ قاتىسۋشىلارىنا قولدانىستاعى زاڭناماعا سايكەس سالىق جەڭىلدىكتەرى مەن پرەفەرەنسيالار بەرىلەدى. قازىرگى ۋاقىتتا الاتاۋ قالاسى مەن ارنايى ەكونوميكالىق ايماقتا 23 ينۆەستيسيالىق جوبا جۇزەگە اسىرىلۋدا.

سونداي-اق، وبلىس ماڭىزدى كولىك تورابى: ايماق ارقىلى «باتىس ەۋروپا – باتىس جۇڭگو» حالىقارالىق اۆتوموبيل ءدالىزى وتەدى، بۇل «ءبىر بەلدەۋ، ءبىر جول» باستاماسى اياسىندا كولىك اعىندارىنىڭ ۇلعايۋىنا ىقپال ەتەدى. الماتى وبلىسىندا جۇك تاسىمالداۋ ۋاقىتىن ايتارلىقتاي قىسقارتاتىن تەمىرجول مارشرۋتتارىنىڭ كەڭ جەلىسى جۇمىس ىستەيدى. ەگەر قىتايدان تەڭىز ارقىلى تاسىمالداۋ 40-45 كۇندى قاجەت ەتسە، جاڭا تەمىرجول مارشرۋتى ارقىلى قىتايدان ەۋروپاعا جۇك جەتكىزۋ نەبارى 14 كۇندى الادى. ناتيجەسىندە ايماقتاعى لوگيستيكالىق تاسىمالداردىڭ 92%-ى تەمىرجول جانە اۆتوموبيل كولىگى ارقىلى جۇزەگە اسىرىلادى.

ەسكە سالايىق، بۇعان دەيىن الماتى وبلىسىنا 7 ايدا 420 ميلليارد تەڭگەدەن استام ينۆەستيسيا تارتىلعانى حابارلانعان ەدى.

سونىمەن قاتار الماتى وبلىسى شەتەلدەن كەلەتىن ينۆەستيسيالاردىڭ تارتىلىس كۇشىنە اينالا الدى ما دەگەن ساۋالعا جاۋاپ ىزدەپ كورگەن ەدىك.