پروكۋراتۋرا مالىمەتىنشە، ۇيگە باسا-كوكتەپ كىرىپ، بالالاردى ۇرىپ-سوعىپ، بايلاپ كەتكەن ەر ادام ءۇش باپ بويىنشا كۇدىككە ىلىنگەن.

"كۇدىكتىگە قاتىستى ق ر قىلمىستىق كودەكسىنىڭ 120-بابىنىڭ 4-بولىگى، 126-باپتىڭ 2-بولىگىنىڭ 5، 7-تارماعى، 149-بابىنىڭ 2-بولىگى، 120-باپتىڭ 1-بولىگى "زورلاۋ، ياعني جابىرلەنۋشىگە نەمەسە باسقا ادامدارعا كۇش قولدانىپ نەمەسە ونى قولدانۋ قاتەرىن ءتوندىرىپ نەمەسە جابىرلەنۋشىنىڭ دارمەنسىز كۇيىن پايدالانىپ جىنىستىق قاتىناسقا ءتۇسۋ" بويىنشا سوتقا دەيىنگى تەرگەپ-تەكسەرۋ اياقتالىپ، قىلمىستىق ءىس اۋداندىق پروكۋراتۋراسىنا كەلىپ ءتۇستى. ءىس ماتەريالى زەرتتەۋ قورىتىندىسىنا سايكەس، سوتقا جىبەرۋ ماسەلەسى شەشىلەتىن بولادى" دەلىنگەن حابارلامادا.

وسى جىلدىڭ اقپان ايىندا الەۋمەتتىك جەلىدە بالالاردىڭ سوققىعا جىعىلعانى تۋرالى ۆيدەو تاراعان بولاتىن. وندا اياق-قولى بايلانىپ، بەت-اۋزى كوگەرگەن كىشكەنتاي ۇل مەن قىز بالانىڭ قاتتى شوشىنىپ، سويلەي الماي جاتقان جانە ولارعا كورشىلەرىنىڭ كومەك كورسەتىپ جاتقان ءساتى تۇسكەن.

كەيىن الماتى وبلىسىنىڭ باس پوليسەيى باۋىرجان الەنوۆ كۇدىكتىنىڭ ۇستالعانىن جەتكىزدى.

سونداي–اق، الماتى وبلىسىنىڭ دارىگەرلەرى بەلگىسىز ەر ادامنان تاياق جەگەن بالالاردىڭ جاعدايى تۋرالى ايتتى.