قاسىم-جومارت توقايەۆ استانا اكىمى جەڭىس قاسىمبەكتى قابىلدادى، دەپ حابارلايدى Qamxhy.kz اقپارات اگەنتتىگى اقوردانىڭ باسپا ءسوز قىزمەتىنىڭ حابارلاماسىنا سىلتەمە جاساي وتىرىپ.

مەملەكەت باسشىسىنا 2024 جىلدىڭ ءبىرىنشى جارتىجىلدىعىندا ەلوردانىڭ الەۋمەتتىك-ەكونوميكالىق جانە ينفراقۇرىلىمدىق دامۋى تۋرالى اقپارات ۇسىنىلدى.

جەڭىس قاسىمبەك بايانداعانداي، بارلىق نەگىزگى ەكونوميكالىق كورسەتكىشتەر بويىنشا وڭ ديناميكا بايقالادى. ينۆەستيسيا كولەمى 632 ميلليارد تەڭگەدەن استى، بۇل وتكەن جىلدىڭ سايكەس كەزەڭىنەن 13،2 پايىزعا جوعارى. وڭدەۋ ونەركاسىبى، مەديسينا، ءبىلىم بەرۋ، كولىك جانە لوگيستيكا سالالارىندا جوبالار بەلسەندى ىسكە اسىرىلۋدا.

"پرەزيدەنتكە مەكتەپتەر، قولجەتىمدى جەڭىلدىكتى تۇرعىن ۇيلەر مەن مەديسينالىق ورتالىقتار سالۋ، اپاتتى توزىعى جەتكەن ۇيلەردى بۇزۋ، تۇرعىن الاپتاردى دامىتۋ، قالانى اباتتاندىرۋ جانە كوگالداندىرۋ تۋرالى اقپارات بەرىلدى. بيىل 20-دان استام مەكتەپ پەن 4500 ورىندىق 6 ستۋدەنتتىك جاتاقحانا سالىنادى. 170 اۋلا مەن قوعامدىق كەڭىستىكتى، ونىڭ ىشىندە ساياباقتاردى، سكۆەرلەردى، بۋلۆارلاردى اباتتاندىرۋ جانە 70 - كە جۋىق كوشەنى جوندەۋ جوسپارلانۋدا"، - دەلىنگەن اقوردانىڭ حابارلاماسىندا.

سونداي-اق، اكىم تۇرعىن ءۇي كەشەندەرىن-ۇزاق قۇرىلىستاردى اياقتاۋ بويىنشا جۇرگىزىلىپ جاتقان جۇيەلى جۇمىستار تۋرالى ايتىپ بەردى. پاتەر كىلتتەرى 16 مىڭنان 15،5 مىڭ ۇلەسكەر وتباسىنا تابىستالدى. قالعان وتباسىلار وسى جىلدىڭ سوڭىنا دەيىن پاتەر كىلتتەرىن الادى.

مەملەكەت باسشىسىنا جىلىتۋ ماۋسىمىنا دايىندىق تۋرالى باياندالدى. بيىل ءبىرىنشى كەزەكتە "تەلمان" گاز جىلۋ ستانسياسىن، ەكىنشى كەزەكتە "تۇران" گاز جىلۋ ستانسياسىن جانە جەو-3 كومىر بولىگىن پايدالانۋعا بەرۋ جوسپارلانۋدا.

"سوڭىندا قاسىم-جومارت توقايەۆ قالانى الەۋمەتتىك-ەكونوميكالىق دامىتۋ جانە اباتتاندىرۋ، سونداي - اق V دۇنيەجۇزىلىك كوشپەندىلەر ويىندارىنا دايىندىق بويىنشا ءبىرقاتار مىندەتتەر قويدى"،-دەلىنگەن اقوردانىڭ باسپا ءسوز قىزمەتىنىڭ حابارلاماسىندا.

2023 جىلعى شىلدەدە ەلوردانى دامىتۋ ماسەلەلەرى جونىندەگى كەڭەستە پرەزيدەنت توقايەۆ وزىنە جۇكتەلگەن مىندەتتەردى ۋاقتىلى جانە ساپالى شەشۋدى تاپسىردى. ونىڭ ايتۋىنشا، استانا ەلىمىزدىڭ باس قالاسىنىڭ مارتەبەسىنە تولىق سايكەس كەلۋى ءتيىس. استانانى اباتتاندىرۋ تۇتاستاي العاندا ەلدىڭ ىلگەرىلەۋىنە الىپ كەلەدى، دەپ بۇعان دەيىن توقايەۆ سەندىرگەن بولاتىن. سول كەزدە مەملەكەت باسشىسى جەڭىس قاسىمبەككە قالاداعى جاعدايدى جاقسارتۋعا ءبىر جىل ۋاقىت بەردى.

"ءسىزدىڭ جۇمىسىڭىز مەنىڭ جەكە باقىلاۋىمدا بولادى. سىزگە بارلىق قاجەتتى كومەك كورسەتىلەدى. دەگەنمەن، جۇمىس ناتيجەلەرى تەك سىزگە بايلانىستى. تابىس تىلەيمىن"، - دەدى پرەزيدەنت توقايەۆ 2023 جىلدىڭ جازىندا.