جاڭا وقۋ جىلى قارساڭىندا الماتىدا جەكە ينۆەستيسيالار ەسەبىنەن سالىنعان 980 توسەك-ورىنعا ارنالعان ءۇش زاماناۋي جاتاقحانا اشىلدى، دەپ حابارلايدى Qamshy،kz اقپاراتتىق اگەنتتىگى.
سالتاناتتى ءراسىم 2024 جىلدىڭ 24 تامىزىندا ءوتتى. وعان ق ر عىلىم جانە جوعارى ءبىلىم ءمينيسترى ساياسات نۇربەك، قالا اكىمىنىڭ ورىنباسارى ازامات قالدىبەكوۆ، قوعامدىق بەلسەندىلەر مەن قالا جاستارى قاتىستى.
"جاتاقحانالار ءتيىستى تالاپتارعا تولىق جاۋاپ بەرەدى. مۇندا بارلىق قاجەتتى تۇرمىستىق زاتتار بار. سونداي-اق، كورپۋستا ستۋدەنتتەرگە ارنالعان كوۆوركينگ-ايماق، اسحانا مەن كونفەرەنس-زال قاراستىرىلعان"، - دەپ حابارلادى مەگاپوليس اكىمدىگى.
بۇعان دەيىن اكىم ەربولات دوسايەۆ جاتاقحانالار پروبلەماسى ونىڭ تىكەلەي باقىلاۋىندا ەكەنىن اتاپ وتكەن بولاتىن. ول الماتىعا وقۋعا كەلگەن ستۋدەنتتەردى جوعارى بىلىممەن قاتار جايلى جاعدايدا تۇرۋمەن قامتاماسىز ەتۋ قاجەتتىگىن اتاپ ءوتتى.
جاڭا جاتاقحانالاردىڭ اشىلۋىندا اكىمنىڭ ورىنباسارى ازامات قالدىبەكوۆ ەربولات دوسايەۆتىڭ قۇتتىقتاۋىن وقىدى:
"ستۋدەنتتەر ءۇيى-بۇل الماتى كارتاسىنداعى جاڭا نىسان عانا ەمەس. مۇنداي جاعدايدا ءار ستۋدەنت ءوزىن ۇيدە سەزىنەدى، سونىمەن بىرگە ءوزى ءۇشىن جاڭا ورتاعا وڭاي ەنىپ، ساپالى ءبىلىم الىپ، قالانىڭ دامۋىنا ءوز ۇلەسىن قوسا الادى. قۇرىلىس جەكە قاراجات ەسەبىنەن جۇرگىزىلگەنىن اتاپ وتكىم كەلەدى، بۇل جالپى ءوزىن-وزى قامتاماسىز ەتەتىن مەگاپوليس ءۇشىن جاقسى تاجىريبە".
سونداي-اق ازامات قالدىبەكوۆ الماتى اكىمدىگى قازاقستاندىق جانە شەتەلدىك ستۋدەنتتەردىڭ جايلى تۇرۋى ءۇشىن ستۋدەنتتىك جاتاقحانالار سالۋدى جالعاستىرۋعا نيەتتى ەكەنىن اتاپ ءوتتى. 2024 جىلى 5025 توسەك-ورىنعا ارنالعان ون نىساندى، ال 2025-2026 جىلدارى 34 مىڭنان استام توسەك-ورىندى پايدالانۋعا بەرۋ جوسپارلانۋدا.
ەستەرىڭىزگە سالا كەتەيىك، جاتاقحانالاردى سالۋ بويىنشا جۇمىستى ءتيىمدى ۇيلەستىرۋ ءۇشىن ستۋدەنتتىك جاتاقحانالاردى سالۋ بويىنشا جوبالىق كەڭسە ءوز جۇمىسىن جالعاستىرۋدا. ونىڭ نەگىزگى مىندەتى-الماتى اۋماعىندا جاتاقحانالار سالۋ جانە ستۋدەنتتەردى تۇرعىن ۇيمەن قامتاماسىز ەتۋ جونىندەگى مەملەكەتتىك باعدارلامانى ىسكە اسىرۋ ءۇشىن قولايلى جاعدايلار جاساۋ. ىسكە قوسىلعان ساتتەن باستاپ جوبالىق كەڭسەگە 120 الەۋەتتى ينۆەستور جۇگىندى، ولاردىڭ 67ء-سى ءقازىر جۇمىستا، بۇل وسى قولداۋ تەتىگىنىڭ تارتىمدىلىعىن كورسەتەدى.
بۇعان دەيىن قازاقستاندىق جوعارى وقۋ ورىندارىندا جاتاقحانالارداعى ورىنداردى ءبولۋ كەزىندە ءتاسىل وزگەرەتىنى حابارلانعان بولاتىن. ءتيىستى تۇزەتۋلەر عىلىم جانە جوعارى ءبىلىم مينيسترلىگىندە دايىندالدى.
پىكىر قالدىرۋ