مينيسترلىك جاريالاعان مالىمەتتەرگە سايكەس، قىركۇيەك ايىندا ەلگە 597 مىڭ شەتەلدىك تۋريست كەلگەن. ولاردىڭ 68 مىڭى استانا مەن الماتى اۋەجايلارى ارقىلى كەلسە، 529 مىڭى جەرۇستى كولىگىمەن كەلگەن.

ەڭ كوپ تۋريست قىتايدان (33 مىڭنان استام)، ءۇندىستاننان (6 مىڭنان استام) جانە گەرمانيادان (4 مىڭنان استام) كەلگەن. شەتەلدىك قوناقتاردىڭ جالپى شىعىندارى 15،5 ميلليون دوللار (7،5 ميلليارد تەڭگە) بولدى. الىس شەتەلدەردەن كەلگەن تۋريستەردىڭ ورتاشا شىعىندارى 1500 دوللار بولعان.

"8-13 قىركۇيەك ارالىعىندا استانادا وتكەن دۇنيەجۇزىلىك كوشپەندىلەر ويىندارى قازاقستان ەكونوميكاسىنا 625 مىڭ دوللار اكەلدى. ەتنواۋىل مەن شارانىڭ وزىنە 250 مىڭنان استام كورەرمەن كەلگەن"، - دەلىنگەن ۆەدومستۆو حابارلاماسىندا.

قىركۇيەك ايىنىڭ 8-13 كۇندەرى ارالىعىندا ەلوردادا دۇنيەجۇزىلىك كوشپەندىلەر ويىندارىنىڭ اشىلۋ ءراسىمى ءوتتى.

"استانا ارەنا" ستاديونىندا قاسىم-جومارت توقايەۆ ءسوز سويلەدى. شارانىڭ قوناقتارى رەتىندە وزبەكستان پرەزيدەنتى شاۆكات ميرزيەيەۆ، قىرعىزستان پرەزيدەنتى سادىر جاپاروۆ، تۇرىكمەنستاننىڭ حالىق ءماسليحاتى ءتوراعاسى گۋربانگۋلى بەردىمۇحامەدوۆ، تاتارستان رەسپۋبليكاسىنىڭ باسشىسى رۋستام ميننيحانوۆ، ساحا رەسپۋبليكاسىنىڭ باسشىسى ايسەن نيكولايەۆتار قاتىستى.

ودان بولەك، 89 ەل سپورتشىلارىنىڭ شەرۋى ءوتتى. ويىندار 13 قىركۇيەكتە اياقتالدى. قورىتىندى بويىنشا، مەدالدار كەستەسىندە قازاقستان 115 مەدالمەن ءبىرىنشى ورىن الدى. ەكىنشى جانە ءۇشىنشى ورىندارعا قىرعىزستان مەن وزبەكستان يە بولدى.