بۇگىن استانادا «تازا قازاقستان» ناۋقانى مەن Taza Astana جاڭا الەۋمەتتىك جوباسىنىڭ اياسىندا سەنبىلىك ءوتىپ، «حان-شاتىر» ساۋدا ويىن-ساۋىق ورتالىعىنىڭ ماڭىنا ەلىمىزدىڭ تانىمال سپورتشىلارىنىڭ قاتىسۋىمەن اعاش وتىرعىزىلدى. ءىس-شارانىڭ وتۋىنە استانا قالاسىنىڭ دەنە شىنىقتىرۋ جانە سپورت باسقارماسى مەن نۇرا اۋدانىنىڭ اكىمدىگى ۇيىتقى بولعان.
وسىناۋ ءىس-شاراعا شورت-ترەكتەن قىسقى وليمپيادانىڭ قاتىسۋشىسى، ەل تاريحىنداعى الەم كۋبوگىنىڭ ءبىرىنشى جەڭىمپازى ابزال اجىعالييەۆ، شورت-ترەكتەن قىسقى ۋنيۆەرسيادانىڭ كۇمىس جۇلدەگەرى ماليكا ەرمەك، قازاقستاندىق فۋتبولشى، قازاقستان مەديا فۋتبول فەدەراسياسىنىڭ تۇڭعىش پرەزيدەنتى ديدار سىدىبەك، V دۇنيەجۇزىلىك كوشپەندىلەر ويىندارىنىڭ چەمپيوندارى مەن ەلشىلەرى بەلسەنە قاتىستى.
– ءوزىم ورال قالاسىنىڭ تۋماسىمىن. تۋعان جەرىم جاپ-جاسىل ءارى اعاشتارعا باي. ول جاقتا تۇراقتى تۇردە سەنبىلىككە قاتىسىپ، ەكولوگيانىڭ تازا بولۋىنا ۇلەس قوساتىن ەدىم. ال 2018 جىلى استانا قالاسىنا كوشىپ كەلدىم. ەلىمىزدىڭ استاناسى دا اعاشتارعا باي، اسەمدىگىمەن ەرەكشەلەنسە دەيمىن. سوندىقتان بۇگىنگى سەنبىلىك پەن «تازا قازاقستان» اكسياسىنىڭ ءبىر مۇشەسى بولعانىما وتە قۋانىشتىمىن، – دەدى ابزال اجىعالييەۆ.
ەكولوگيالىق اكسيا بارىسىندا بەس اۋداندا 2 مىڭنان استام جاسىل جەلەك، ال حان-شاتىردىڭ ماڭىندا ەمەن، قايىڭ، قاراعاي سىندى 100-دەن استام كوشەت وتىرعىزىلدى.
– 5ء-شى دۇنيەجۇزىلىك كوشپەندىلەر ويىندارىندا قۇسبەگىلىكتەن ەل تاريحىندا تۇڭعىش التىندى يەلەندىم. 2018 جىلى قىرعىزستان ەلىندەگى دودادا قولا جۇلدەگەر اتانعان بولاتىنمىن. الايدا استانا قالاسىندا شارا ۇيىمداستىرۋ دەڭگەيىنىڭ جوعارلىلىعىمەن ەرەكشەلەنە ءبىلدى. جالپى قالالىق سەنبىلىككە قاتىسۋ بالا كەزدەن قالىپتاسقان. وسىنداي شارالار ارقىلى بويعا جاقسى ادەتتەر قالىپتاسىپ، وزگەلەرگە ۇلگى بولامىز، – دەدى 5ء-شى دۇنيەجۇزىلىك كوشپەندىلەر ويىندارىندا استانا قالاسىنىڭ ەلشىسى ءارى چەمپيونى ەرتۋعان سەرىكبەك ويىمەن ءبولىسىپ.
ەستەرىڭىزگە سالا كەتەيىك، ەلوردادا Taza Astana جاڭا الەۋمەتتىك جوباسى ءوتىپ جاتىر. جوبا قۇقىقتىق ءتارتىپ، اباتتاندىرۋ، كوگالداندىرۋ، سانيتارلىق تازالاۋ، كوپپاتەرلى تۇرعىن ۇيلەردىڭ، ءۇي جانىنداعى، ورامىشىلىك جانە اۋلا اۋماقتارىنىڭ كىرمە جولدارىنىڭ تازالىعى ماسەلەلەرى بويىنشا جۇيەلى جۇمىس جۇرگىزۋگە باعىتتالعان.
دەرەككوز: elordainfo.kz
پىكىر قالدىرۋ