كەڭەس مينيسترلىكتىڭ، حالىقارالىق ۇيىمداردىڭ جانە دونورلىق قاۋىمداستىقتىڭ كۇش-جىگەرىن ۇيلەستىرە وتىرىپ، ەلدەگى ۇزاق مەرزىمدى ەكولوگيالىق تۇراقتىلىق پەن ەكونوميكالىق دامۋدى ىلگەرىلەتۋدە ماڭىزدى ءرول اتقارادى. ۇيلەستىرۋ كەڭەسى رەسۋرستاردى جۇمىلدىرۋعا، باسقارۋدى نىعايتۋعا، وڭىرلىك ىنتىماقتاستىقتى كەڭەيتۋگە جانە سۋ رەسۋرستارىن باسقارۋدا تۇراقتى تاجىريبەلەردى ىلگەرىلەتۋگە ىقپال ەتەتىن بولادى.
«ءبىر جىل بۇرىن بۇل سالادا جاڭا مينيسترلىك قۇرىلدى. وسى ۋاقىت ىشىندە نەگىزگى ءۇش باعىتتا جۇمىستاردى اتقاردىق. بىرىنشىدەن، جاڭا قۇقىقتىق بازانى قالىپتاستىرۋعا ەكپىن قويىلدى. پارلامەنت ماجىلىسىندە سۋ كودەكسىنىڭ جوباسى قارالىپ جاتىر جانە جىلدىڭ اياعىنا دەيىن وسى قۇجات قابىلدانۋى مۇمكىن. سونىمەن قاتار، سۋ رەسۋرستارى باعىتىندا 2024-2030 جىلدارعا ارنالعان تۇجىرىمدامانى بەكىتتىك. اتاپ ايتقاندا، سالاداعى جۇمىستاردى جۇزەگە اسىرۋ ءۇشىن بۇگىن ەلوردادا سۋ سەكتورىن دامىتۋ بويىنشا سەرىكتەستەردىڭ ۇيلەستىرۋ كەڭەسىنىڭ ءبىرىنشى وتىرىسىن ۇيىمداستىردىق»، - دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ ەلوردادا وتكەن جيىندا تىلشىلەر سۇراعىنا جاۋاپ بەرە وتىرىپ.
