سوتتا انىقتالعانداي، 2024 جىلدىڭ 15 مامىرىندا پاكىستان ازاماتتارى ەۋروپاعا جۇمىسقا ورنالاسۋ ءۇشىن ترانزيت جاساۋ ماقساتىندا بىشكەككە كەلگەن. الايدا قىرعىزستان استاناسىندا قارجىلىق قيىندىقتارعا تاپ بولعان ولار مارشرۋتتى وزگەرتىپ، قازاقستان مەن رەسەي ارقىلى وتۋگە شەشىم قابىلداعان.
«وسى ماقساتتا ولار قازاقستانعا قىرعىزستاننىڭ چولپون-اتا، قاراكول جانە كەنسۋ قالالارى ارقىلى جول تارتقان. كەنسۋدان ولار جولدى جاياۋ جالعاستىرىپ، بىرنەشە كۇننەن كەيىن قازاقستاننىڭ شەكاراسىنا جەتكەن. 13 ماۋسىمدا الماتى وبلىسىنىڭ كەگەن اۋدانىندا ولاردى شەكاراشىلار ۇستاپ، قازاقستان شەكاراسىن زاڭدى تۇردە كەسىپ ءوتۋ تۋرالى قاجەتتى بەلگىلەردىڭ جوقتىعىن انىقتادى»،- دەپ حابارلادى سوتتان.
سوت ۇكىمىمەن سوتتالۋشىلار قك-نىڭ 392-بابى 1-بولىگى بويىنشا كىنالى دەپ تانىلىپ، قر-نىڭ شەگىنەن تىسقارا جەرگە 5 جىل مەرزىمگە شىعارىپ جىبەرە وتىرىپ، 6 ايعا باس بوستاندىعىنان ايىرۋ جازاسى تاعايىندالدى.
«قك-نىڭ 62-بابى 3-تارماعىنىڭ 3)-تارماقشاسىنا سايكەس سوتتالۋشىلاردى ۇكىم زاڭدى كۇشىنە ەنگەنگە دەيىن ۇستاۋ ۋاقىتى جازا مەرزىمىنە، باس بوستاندىعىنان ايىرۋ تۇرىندەگى جازانى وتەۋدىڭ ەكى كۇنى ءۇشىن ءبىر كۇن ەسەبىمەن جازا مەرزىمىنە ەسەپكە جاتقىزىلادى، وسىعان بايلانىستى سوتتالعاندار باس بوستاندىعىنان ايىرۋ جازاسىن وتەۋدەن بوساتىلدى. قازاقستان رەسپۋبليكاسىنان تىسقارا جەرگە شىعارىپ جىبەرۋ تۇرىندەگى قوسىمشا جازا ۇكىم زاڭدى كۇشىنە ەنگەن كەزدەن باستاپ ورىندالۋعا ءتيىس»،- دەپ اتاپ ءوتتى ۆەدومستۆودان.
ۇكىم زاڭدى كۇشىنە ەنگەن جوق.
پىكىر قالدىرۋ