- 7 قازاندا استانانىڭ ازاماتتىق ىستەر جونىندەگى اۋدانارالىق سوتى قازاقستاندىق توعىز ءجۋرناليستىڭ مادەنيەت جانە اقپارات مينيسترلىگىنىڭ «جۋرناليستەردى اككرەديتاسيالاۋدىڭ ۇلگىلىك ەرەجەسىن» بەكىتۋ تۋرالى جاڭا بۇيرىعىنىڭ ەرەجەلەرىنە قارسى شاعىمدانعان ۇجىمدىق تالاپ ارىزىن قابىلدادى. تالاپكەرلەردىڭ ايتۋىنشا، بۇل نورماتيۆتىك قۇقىقتىق اكت ءسوز بوستاندىعى مەن اقپارات تاراتۋداعى كونستيتۋسيالىق قۇقىعىمىزدى ورەسكەل بۇزادى، دەلىنگەن حابارلامادا.

باستى ماسەلە – اككرەديتتەلگەن ءجۋرناليستىڭ مەملەكەتتىك ورگانداردان الىنعان اقپاراتتى ءجۋرناليستى اككرەديتتەگەننەن باسقا كەز كەلگەن ب ا ق ارقىلى تاراتۋىنا تىيىم سالاتىن تارماق بولىپ وتىر. بۇل شارت ەكى رەت بۇزىلسا، جۋرناليست التى ايعا دەيىن اككرەديتاسياسىنان ايىرىلۋى مۇمكىن. تالاپكەرلەردىڭ پىكىرىنشە، بۇل تالاپ قازاقستان رەسپۋبليكاسى كونستيتۋسياسىنىڭ 20، 39-باپتارىنا جانە ق ر «ماسس-مەديا تۋرالى» زاڭىنا قايشى كەلەدى، ولاردىڭ اقپاراتتى ەركىن الۋ مەن تاراتۋعا كونستيتۋسيالىق قۇقىعىن شەكتەيدى.

«ءادىل ءسوز» ءسوز بوستاندىعىن قورعاۋ حالىقارالىق قورى جۋرناليستەردىڭ مۇددەسىن سوتتا قورعاپ، ولارعا قۇقىقتىق قولداۋ كورسەتەدى.

«اككرەديتاسيالاۋدىڭ ۇلگىلىك ەرەجەسىن ەنگىزۋ «قۇقىقتىق اكتىلەر تۋرالى» زاڭدى بۇزۋ ارقىلى ءوتتى اتاپ ايتقاندا، ۇلگىلىك ەرەجەنىڭ قولدانىلۋ مەرزىمىن «وتكەن كۇنمەن» قويۋ، نەگىزى جاڭا زاڭدى جاۋاپكەرشىلىكتى بەلگىلەيتىن قۇقىقتىق اكتىلەر رەسمي جاريالانعاننان كەيىن كۇنتىزبەلىك 60 كۇن وتكەنگە دەيىن كۇشىنە ەنبەيتىنىنە نازار اۋدارعىم كەلەدى. مەملەكەت ازاماتتاردىڭ زاڭدى مۇلتىكسىز ساقتاۋىن تالاپ ەتەدى، سوندىقتان ونىڭ ورگاندارى زاڭنامانىڭ پروسەسسۋالدىق تالاپتارىن ەلەمەۋگە مورالدىق تا، زاڭدىق تا قۇقىعى جوق»، دەيدى قور پرەزيدەنتى كارلا جامانقۇلوۆا.

ۇيىمداردىڭ رەسمي حابارلامالارى اككرەديتاسياسىنا قاراماستان بارلىق جۋرناليستەرگە بەرىلەدى. وسىلايشا، اقپاراتتى اككرەديتتەۋ تۋرالى ءوتىنىش بەرىلگەن بۇقارالىق اقپارات قۇرالدارىندا عانا جاريالاۋ تۋرالى تالاپ جۋرناليستىك قىزمەت ەركىندىگىن شەكتەپ، اقپاراتقا تەڭ قولجەتىمدىلىك قاعيداتىن بۇزۋى مۇمكىن. بۇل شارت مەملەكەتتىك ورگاندا اككرەديتاسياسى بار جانە اككرەديتاسياسىز جۋرناليستەردىڭ تەڭسىزدىگىن تۋدىرادى. ولاردى ءارتۇرلى ب ا ق پەن الەۋمەتتىك جەلىلەردە اقپاراتتى ەركىن تاراتۋ مۇمكىندىگىنەن ايىرادى. ق ر كونستيتۋسياسىنىڭ 20-بابىندا ءسوز بوستاندىعىنا، ونىڭ ىشىندە اقپاراتتى ەركىن الۋ جانە تاراتۋ قۇقىعىنا كەپىلدىك بەرىلگەن.

«مەملەكەت بريفينگتەردە بەرىلگەن اقپاراتتىڭ حالىق اراسىندا مۇمكىندىگىنشە كەڭ تارالۋىنا مۇددەلى بولۋى كەرەك. ال ادامداردىڭ جاڭالىقتاردى الۋ ادەتى ءارتۇرلى بىرەۋلەر گازەت وقيدى، ەندى بىرەۋلەر الەۋمەتتىك جەلىنى قارايدى. مەملەكەت اقپارات تاراتۋ ارنالارىن شەكتەمەي، مۇمكىندىگىنشە كوپ ادامعا جەتكىزۋدى سۇراۋى كەرەك. ءانونيمدى ارنالاردىڭ قاپتاعان ۋاقىتىندا كاسىبي جۋرناليستەردىڭ اۆتورلىق كونتەنتىنە شەكتەۋ قويۋ – اقىماقتىق. ءادىل سوت ءبىزدىڭ پايدامىزعا شەشىلىپ، قوعامعا ەشقانداي پراكتيكالىق پايدا اكەلمەيتىن جانە كاسىبي جۋرناليستەردىڭ جۇمىسىن قيىنداتاتىن بۇل قيسىنسىز تالاپ جويىلاتىنىنا سەنىمدىمىن»، دەدى ۇجىمدىق شاعىمعا قول قويۋشىلاردىڭ ءبىرى، «ۆلاست» ينتەرنەت-جۋرنالى استانا بيۋروسىنىڭ جەتەكشىسى،تامارا ۆاال.

تالاپكەرلەر مادەنيەت جانە اقپارات مينيسترلىگى بەكىتكەن بۇيرىقتىڭ كەيبىر تارماقتارىن زاڭعا قايشى دەپ تانىپ، ونىڭ كۇشىن جويۋدى تالاپ ەتەدى.