كەيىنگى كەزدەرى الاياقتار ءارتۇرلى جاڭا سەنارييلەر ويلاپ تاپقان. سونىڭ ءبىرى – سالىمشىلار مەن الۋشىلارعا قور قىزمەتكەرلەرىنىڭ اتىنان قوڭىراۋ شالىپ، بجزق-عا زەينەتاقى اۋدارىمدارى قاتە جاسالعانى، سول ءۇشىن بولىمشەگە بارۋ قاجەتتىگى جانە SMS ارقىلى ەلەكتروندى برونداۋعا مۇمكىندىك بار ەكەنى تۋرالى ايتىلادى.
"بۇدان كەيىن الاياقتار تەلەفونعا كەلگەن تالون ءنومىرىن نەمەسە كودتى اتاپ، راستاۋدى سۇرايدى. وسىلايشا ولار ءسىزدىڭ بانكتىك شوتتارىڭىزعا جانە جەكە مالىمەتتەرىڭىزگە قول جەتكىزە الادى. مۇنداي الاياقتىققا جول بەرمەۋ ءۇشىن مىنانى ءبىلۋ كەرەك: بجزق قىزمەتكەرلەرى ازاماتتارعا قوڭىراۋ سوقپايدى! سوندىقتان قىراعى بولىپ، بوگدە ادامدارعا ەشقانداي كود بەرمەڭىز. سونداي-اق بەيتانىس سىلتەمەلەرگە وتپەڭىز"، دەلىنگەن قور حابارلاماسىندا.
ءوزىڭدى قالاي قورعاۋعا بولادى؟
- ەشقاشان جانە ەشكىمگە ءوزىڭىزدىڭ كودتارىڭىزدى نەمەسە قۇپياسوزدەرىڭىزدى ايتپاڭىز.
- اقپاراتتى رەسمي ارنالار ارقىلى تەكسەرىڭىز.
- ەگەر سىزگە بجزق اتىنان قوڭىراۋ شالىنسا، تەلەفوندى قويىپ، قورعا تىكەلەي حابارلاسىڭىز!
- قارجىلىق جانە زەينەتاقى قىزمەتتەرىن الۋ ءۇشىن كومەك ۇسىناتىن دەلدالداردىڭ قىزمەتىن پايدالانباڭىز. سەبەبى ولار ءسىزدىڭ جەكە دەرەكتەرىڭىزدى ءوز مۇددەلەرى ءۇشىن پايدالانۋى مۇمكىن.
- بۇل اقپاراتتى ءبولىسىپ، جاقىندارىڭىز دا حاباردار بولىپ، قورعالعانىنا كوز جەتكىزىڭىز.
بارلىق سۇراقتارىڭىزعا جاۋاپ الىپ، اقپاراتتى تەكسەرۋ ءۇشىن ەنپف بولىمشەلەرىندە نەمەسە قاشىقتىقتان بايلانىس ورناتۋعا بولادى: enpf.kz سايتىندا، بجزق/ەنپف موبيلدىك قوسىمشاسى ارقىلى، 1418 نومىرىنە تەگىن قوڭىراۋ شالۋ ارقىلى نەمەسە WhatsApp نومىرىنە +7 777 000 1418 حابارلاسۋ ارقىلى.
سونىمەن قاتار بزجق-نىڭ رەسمي الەۋمەتتىك جەلىلەردەگى پاراقشالارىندا، مىسالى، "ودنوكلاسسنيكي"، Telegram، "Facebook"، "ۆكونتاكتە"، "ح" ("Twitter") جانە "Instagram" ارقىلى بايلانىسۋعا بولادى.
پىكىر قالدىرۋ