2021 جىلى سالىمشىلار قۇرىلىمدىق نوتالاردى ساتىپ العان ەدى. الايدا 2023 جىلدىڭ كوكتەمىندە بۇل قارجىلىق قۇرالداردىڭ قۇنى كەنەتتەن 70%-دان 90%-عا دەيىن تومەندەگەن. ءدال وسى كەزدە كوتيروۆكالاردى (باعا بەلگىلەۋ) باقىلاۋعا بولاتىن قوسىمشا ىستەمەي قالعان. ناتيجەسىندە، ادامدار قۇندى قاعازدارىن دەر كەزىندە ساتا الماي، ءوز قاراجاتتارىنان ايىرىلعان.

قاراجاتتى ساقتاپ، كوبەيتەمىز دەپ جوسپارلاعان كليەنتتەر، كەرىسىنشە، جيناقتارىنان ايىرىلدى. Jusan Invest كليەنتتەرىنىڭ ايتۋىنشا، بروكەر قۇرىلىمدىق نوتالاردى 12% جانە ودان جوعارى تابىسپەن دەپوزيت رەتىندە ۇسىنعان. سونىمەن قاتار باعانىڭ تومەندەۋىنەن ساقتاندىرۋ قورعاۋى دا بار دەپ كورسەتىلگەن.

جاپا شەككەندەردىڭ ءبىرى – قۋات دومباي ءبىر ساتتە 10 ميلليون تەڭگەدەن استام قاراجاتىن جوعالتتى. قۇرىلىمدىق نوتالاردىڭ قۇنى قۇلدىراعان كەزدە، ول اكسيالاردىڭ باعاسىن ۋاقىتىندا بىلە الماعان.

"ءبىزدى اشىق تۇردە اداستىردى. بۇل قارجىلىق قۇرالداردىڭ وزەكتى باعاسى بار ەكەنىن بىلدىك، ءبىراق ءبىز ولارعا دەپوزيت رەتىندە قارادىق. بىزگە سولاي ءتۇسىندىردى. ەگەر مەن ساتىپ العان ساتتەن-اق ولاردىڭ باعاسى تومەندەۋى نەمەسە كوتەرىلۋى مۇمكىن ەكەنىن بىلگەنىمدە دەر كەزىندە شارا قولدانار ەدىم”، – دەيدى ول.

بارلىق كليەنتتەر قارجىلىق ساۋاتتى ادامدار، ءبىراق ولارعا ناقتى قاۋىپتەر تۋرالى ەسكەرتپەگەن دەيدى زاڭگەر.

"بۇل جەردە “ادامداردى الداعان با؟"دەگەن سۇراق تۋىندايدى. ويتكەنى ولار قاعازداردىڭ ناقتى قۇنى قانشا ەكەنىنەن بەيحابار بولعان. بۇل سۇراققا جاۋاپ بولعان جوق. تەك باعانى وزدەرىڭىز قاداعالاۋىڭىز كەرەك ەدى دەگەن جاۋاپ قانا بەرىلدى”، – دەيدى زاڭگەر ايدار قاشقارباي. 

قارجىلىق نارىقتى رەتتەۋ جانە دامىتۋ اگەنتتىگى تەكسەرۋ ناتيجەسىندە 82 اكىمشىلىك قۇقىقبۇزۋشىلىق تۋرالى حاتتاما تولتىرعان. Jusan Invest بروكەرلىك كومپانيا كليەنتتەرى ينۆەستيسيالىق قاۋىپتەر تۋرالى حاباردار ەتىلگەن دەپ جاۋاپ بەردى.

"اتالمىش قۇرىلىمدىق نوتالار – جوعارى تاۋەكەلدى قۇرال، وعان 20%-عا دەيىنگى جىلدىق پايىزدىق مولشەرلەمەلەر دالەل. بۇل – قازاقستاننىڭ ەكىنشى دەڭگەيلى بانكتەرىندەگى دەپوزيتتەردەگى 1% تابىسپەن سالىستىرعاندا جوعارى كورسەتكىش. قۇرىلىمدىق نوتالار ءىرى حالىقارالىق بانكتەر تاراپىنان شىعارىلعان، ال Jusan Invest تەك وسى قارجىلىق قۇرالداردى ساتىپ الۋ بويىنشا بروكەرلىك قىزمەتتەر كورسەتكەن”، – دەلىنگەن قارجىلىق نارىقتى رەتتەۋ جانە دامىتۋ اگەنتتىگىنىڭ مالىمدەمەسىندە.

كليەنتتەر بروكەرمەن بەيبىت كەلىسىمگە كەلەمىز دەپ ۇمىتتەنەدى. ەگەر ناتيجە بولماسا، ولار سوت ورگاندارىنا جۇگىنبەك.