الەۋمەتتىك جەلىدە مەملەكەتتىك رامىزدەردىڭ قوقىستا جاتقانى تاسپالانعان ۆيدەو تارادى. اۋدان اكىمدىگىنىڭ مالىمەتىنە سايكەس، بەينەجازبا تالعار اۋدانىنا قاراستى قاينار اۋىلدىق وكرۋگىنىڭ ەركىن اۋىلىنىڭ اۋماعىندا ورنالاسقان قوقىستا تۇسىرىلگەن.
- جەرگىلىكتى اتقارۋشى ورگان قىزمەتكەرلەرى قوقىستا تەكسەرىس جۇرگىزدى. تەكسەرىس بارىسىندا مەملەكەتتىك رامىزدەرمەن بىرگە كوللەدج قۇجاتتارى تابىلدى. رامىزدەر قوقىستان شىعارىلدى. جويۋ جۇمىستارى مەملەكەتتىك تۋ مەن ءرامىزدى اۋىستىرۋ جانە جويۋ ەرەجەسىنە سايكەس جۇرگىزىلەدى، – دەدى تالعار اۋدانىنىڭ اكىمدىگى.
الماتى وبلىسىنىڭ پوليسيا دەپارتامەنتى مەملەكەتتىك رامىزدەردى قورلاۋ فاكتىسى بويىنشا پوليسيا قىلمىستىق ءىس قوزعالعانىن مالىمدەدى.
- تالعار اۋداندىق پوليسيا قىزمەتكەرلەرى بولعان وقيعانىڭ بارلىق ءمان-جايلارىن انىقتاۋ ءۇشىن قاجەتتى جەدەل ءىس-شارالار ۇيىمداستىردى. كىنالى ادامدارعا قولدانىستاعى زاڭناماعا سايكەس ءتيىستى شارالار قابىلداناتىن بولادى - دەپ حابارلادى وبلىستىق پد باسپا ءسوز قىزمەتى.
پىكىر قالدىرۋ