"جاقىندارىنا كوڭىل ايتامىن. وقيعانىڭ بارلىق ءمان-جايى انىقتالىپ، قاجەت تەرگەۋ شارالارى جۇرگىزىلىپ جاتىر"، – دەپ جازدى ول.

زاكييەۆانىڭ مالىمەتىنشە، 2024 جىلدىڭ قاڭتارىنان بۇگىنگە دەيىن بالالاردىڭ قازاسىنا اكەلگەن 15 ءورت وقيعاسى تىركەلگەن. ولاردىڭ كوبى بالالار ۇيدە جالعىز قالعان كەزدە بولعان.

"بۇل وقيعالاردى تالداي وتىرىپ، 12 جاسقا دەيىنگى بالالاردى ەرەسەك ادامداردىڭ قاراۋىنسىز قالدىرۋعا زاڭمەن تىيىم سالۋدى قاراستىرۋ قاجەت دەپ ەسەپتەيمىن. ارينە، قولداۋدى قاجەت ەتەتىن وتباسىلارعا مەملەكەت تاراپىنان قاراستىرىلعان كومەك باعدارلامالارىمەن قامتاماسىز ەتۋ ماڭىزدى"، – دەپ اتاپ ءوتتى ومبۋدسمەن.

ەسكە سالايىق، بۇعان دەيىن اقمولا وبلىسى بۇلاندى اۋدانى شۇباراعاش اۋىلىندا جەكە تۇرعىن ۇيدە شىققان ءورت سالدارىنان ەكى بالا مەرت بولعان ەدى. ءورت ءۇش شارشى مەتر اۋماقتى قامتىپ، جەتى جانە ءۇش جاسار بالالار تۇتىننەن ۋلانىپ، كوز جۇمدى. وقيعا كۋاگەرلەرى ءورتتى وزدەرى سوندىرگەن. جەدەل قۇتقارۋ قىزمەتىنە قوڭىراۋلار تۇسكەن جوق. ءورتتىڭ سەبەپتەرىن اقمولا وبلىسى توتەنشە جاعدايلار دەپارتامەنتىنىڭ عىلىمي-زەرتتەۋ ءورت سىناۋ زەرتحاناسىنىڭ ماماندارى انىقتاپ جاتىر. بۇلاندى اۋدانىنىڭ توتەنشە جاعدايلار ءبولىمى سوتقا دەيىنگى تەرگەۋدى باستاپ كەتتى.