2024 جىلى وبلىستا اۋىل شارۋاشىلىعى داقىلدارىنىڭ ەگىن جيناۋ الاڭى 749،5 مىڭ گەكتاردى قۇرادى. ونىڭ ىشىندە ءداندى داقىلدار 299،0 مىڭ گا، مايلى داقىلدار 295،8 مىڭ گا، كارتوپ 5،8 مىڭ گا، كوكونىستەر 5،4 مىڭ گا، ال جەمشوپ داقىلدارى 143،5 مىڭ گەكتار القاپقا ەگىلدى. بۇل تۋرالى وبلىس اكىمدىگىندە وتكەن كەڭەيتىلگەن اپپاراتتىق جيىندا وبلىستىق اۋىل شارۋاشىلىعى باسقارماسىنىڭ باسشىسى ەرتاي قۋانبايەۆ ايتتى. 

بۇگىنگى تاڭدا وڭىردە استىق جيناۋ تولىق اياقتالدى. ورتاشا ونىمدىلىگى 15،0 س/گا بولاتىن 449،7 مىڭ توننا استىق باستىرىلدى. 444،8 مىڭ توننادان استام مايلى داقىل، 134،2 مىڭ توننا كارتوپ، 128،4 مىڭ توننا كوكونىس جينالدى. 

5،8 مىڭ گا القاپتان كارتوپ 229،8 س/گا جينالىپ، ناتيجەسىندە 134،2 مىڭ توننا ءونىم الىندى. كوكونىستەردى جيناۋ دا اياقتالدى. ونىمدىلىگى 236،9 س/گا بولاتىن 128،4 مىڭ توننا جينالدى.

ەگىن ورۋ جۇمىسىنا 4 مىڭ تراكتور، 2،4 مىڭ كومباين جانە 700 وراق تارتىلدى. اۋىل شارۋاشىلىعى تەحنيكاسىنىڭ ۇزدىكسىز جۇمىس ىستەۋى ءۇشىن ليترىنە 250 تەڭگە باعامەن 15،3 مىڭ توننا جەڭىلدەتىلگەن ديزەل وتىنى ءبولىندى.

تۇقىم ساپاسىن جاقسارتۋعا ەرەكشە كوڭىل بولىنۋدە. بيىل تۇقىمنىڭ ەليتالىق سورتتارىن پايدالانۋ ۇلەسى 8،3% قۇرادى. بۇل 2023 جىلمەن سالىستىرعاندا 0،8%-عا جوعارى. سونداي-اق 49 مىڭ توننا مينەرالدى تىڭايتقىشتار ەنگىزىلدى.

ماشينا-تراكتور پاركىن جاڭارتۋ اياسىندا «قازاگروقارجى» اق ارقىلى 7 ملرد تەڭگەگە 547 بىرلىك تەحنيكا ساتىپ الىندى. ەگىن جيناۋعا ارنالعان قويمالارعا جالپى سىيىمدىلىعى 206 مىڭ توننا ليسەنزيالانعان ەليەۆاتورلار جانە 870،9 مىڭ توننا فەرمەرلىك استىق قويمالارى كىرەدى.
2025 جىلدىڭ كوكتەمگى ەگىسىنە 39،6 مىڭ توننا تۇقىم دايىندالدى، بۇل قاجەتتى كولەمنىڭ 103،3% قۇرايدى. 

اعىمداعى جىلى وبلىستا سۋ ۇنەمدەۋ تەحنولوگيالارىن قولدانۋ ارقىلى 13،9 مىڭ گەكتار الاڭعا اۋىل شارۋاشىلىعى داقىلدارى ەگىلدى.