"روساتوم" مەملەكەتتىك كورپوراسياسىنىڭ كومپانيالار توبىنا كىرەتىن "ۋرانيۋم ۋان گرۋپ" اق تۇپكى بەنەفيسيارى State nuclear Uranium Resources Development Co.، Ltd (قحر) كومپانياسى بولىپ تابىلاتىن SNURDC Astana Mining Company Limited كومپانياسىنىڭ پايداسىنا "زارەچنوە" بك" اق-نىڭ اكسيالارىنىڭ وزىنە تيەسىلى 49،979%-ىن ساتتى.
بۇل رەتتە وسى بىرلەسكەن كاسىپورىنداعى قازاتومونەركاسىپتىڭ قاتىسۋ ۇلەسى وزگەرگەن جوق جانە ول 49،979%-دى قۇرايدى.
"زارەچنوە" بك" اق 1977 جىلى اشىلعان تۇركىستان وبلىسىنداعى زارەچنوە كەن ورنىندا ۋران ءوندىرۋدى جۇزەگە اسىرادى. كەن ورنىنداعى ۋران قورى 2024 جىلدىڭ باسىندا شامامەن 3،5 مىڭ توننانى قۇراعان. كەن ورنىن يگەرۋدى اياقتاۋ 2028 جىلعا جوسپارلانىپ وتىر.
"ۋرانيۋم ۋان گرۋپ" اق سونداي-اق "حوراسان-U" بك" ءجشس-تىڭ جارعىلىق كاپيتالىنا قاتىسۋ ۇلەسىنىڭ 30 پايىزىن جانە "قىزىلقۇم" ءجشس-تىڭ جارعىلىق كاپيتالىنا قاتىسۋ ۇلەسىنىڭ 30%-ىن مامىلە تاراپتارى ونى جابۋ راسىمدەرىن اياقتاعان جاعدايدا تۇپكى بەنەفيسيارى China General Nuclear Power Corporation (CGN، قحر) بولىپ تابىلاتىن China Uranium Development Company Limited كومپانياسىنىڭ پايداسىنا ساتادى دەپ كۇتىلۋدە. وسى بىرلەسكەن كاسىپورىنداردا قازاتومونەركاسىپتىڭ قاتىسۋ ۇلەسى وزگەرمەيدى، "حوراسان-U" بك" جشس-تە 50% جانە "قىزىلقۇم" جشس-تە 50% (جاناما) دەڭگەيدە ساقتالادى.
"حوراسان-U" بك" ج ش س قىزىلوردا وبلىسىنىڭ جاڭاقورعان اۋدانىنداعى سولتۇستىك حاراسان كەن ورنىنىڭ "حاراسان-1" ۋچاسكەسىندە ۋران ءوندىرۋدى جۇزەگە اسىرادى. كەن ورنىنىڭ قورلارى 2024 جىلدىڭ باسىنداعى جاعداي بويىنشا پايدالانۋ مەرزىمى 2038 جىلعا دەيىنگى 33 مىڭ تونناعا جۋىق ۋراندى قۇرايدى. "حوراسان-U" بك" جشس-تە وندىرىلگەن بۇكىل ۋران تىكەلەي سول يگەرىلىپ جاتقان ۋچاسكەنىڭ وزىندە ورنالاسقان "قىزىلقۇم" ءجشس-تىڭ وندىرىستىك قۋاتتارىندا قايتا وڭدەلەدى. "قىزىلقۇم" ج ش س جەر قويناۋىن پايدالانۋ قۇقىعىنا يە ەمەس جانە تەك ۋراندى قايتا وڭدەۋ بويىنشا قىزمەتتەردى جۇزەگە اسىرادى.
قازاتومونەركاسىپ جاڭا سەرىكتەستەرىن قۇتتىقتاپ، بىرلەسكەن جۇمىستا تابىس تىلەيدى. قازىرگى ۋاقىتتا كومپانيانىڭ ستراتەگيالىق باسىمدىعى مينەرالدى-شيكىزات بازاسىن تولىقتىرۋ جانە قورلاردىڭ تۇراقتى ءوسۋىن قامتاماسىز ەتۋ بولىپ تابىلادى.
كومپانيا پەرسپەكتيۆالى اۋماقتاردى باعالاۋعا جانە جاڭا كەن ورىندارىن اشۋعا باعىتتالعان گەولوگيالىق بارلاۋ جۇمىستارىنىڭ اۋقىمدى باعدارلاماسىن ىسكە قوستى. بۇل باعدارلاما اتوم حولدينگىنىڭ ۇزاق مەرزىمدى پوزيسياسىن نىعايتا وتىرىپ، وڭ ناتيجە بەرەدى. ءبىر عانا بيىلدىڭ وزىندە قازاتومونەركاسىپ پەرسپەكتيۆالى ۋچاسكەلەردە ۋراندى بارلاۋعا ءتورت جاڭا ليسەنزيا الدى، ولاردى كومپانيا تەك ءوز كۇشتەرىمەن ورىنداۋدى جوسپارلاپ وتىر. الدىن الا باعالاۋلار بويىنشا، وسى پەرسپەكتيۆالى ۋچاسكەلەردەگى جالپى بولجامدى رەسۋرستار 180 مىڭ توننادان اسادى.
پىكىر قالدىرۋ