اپتانىڭ بەيسەنبى كۇنى الماتىداعى قابىلداۋ ۇيىندە جازۋشىلار وداعى باسقارماسىنىڭ ۇيىمداستىرۋىمەن قازاقستاننىڭ حالىق جازۋشىسى، ق ر مەملەكەتتىك سىيلىعىنىڭ لاۋرەاتى، كورنەكتى تاريحشى، قوعام قايراتكەرى مۇحتار مۇقان ۇلى ءماعاۋيندى ەسكە الۋعا ارناعان اس بەرىلدى. شارا بارىسىندا جازۋشىنىڭ 350 دانا «التىن وردا» اتتى كىتابى جۇرتشىلىققا تاراتىلدى.

الدىمەن حالقىمىزدىڭ ەجەلگى ءداستۇرى بويىنشا قازاقستان مۇسىلماندار ءدىني باسقارماسىنىڭ نايب يمامى كەنجەعازى مارقۇۇمناڭ رۋحىنا قۇران باعىشتاپ، قادىرمەندى اقساقال سارباس اقتايەۆ اق باتاسىن ارناعان. قازاقتىڭ اسا كورنەكتى كلاسسيك جازۋشىسى مۇحتار ءماعاۋيننىڭ رۋحىنا ارنالعان استى جازۋشىلار وداعىنىڭ باسقارما ءتوراعاسى، قازاقستاننىڭ ەڭبەك سىڭىرگەن قايراتكەرى مەرەكە قۇلكەنوۆ اشىپ، مۇحتار ماعاۋين سىندى سان قىرلى تۇلعانىڭ شىعارماشىلىعى مەن ءومىرى جايلى تولعانا ايتىپ بەردى. 

وسىدان كەيىن كۇيشى، كومپوزيتور، قازاقستاننىڭ ەڭبەك سىڭىرگەن قايراتكەرى ءشامىل ءابىلتاي م.ءماعاۋيننىڭ رۋحىنا ارناپ شىعارعان كۇيىن كوپشىلىك نازارىنا ۇسىنعان. 

مۇحاڭنىن رۋقىنا ارنالعان شارا بارىسىندا اقىن، ق ر مەملەكەتتىك سىيلىعىنىڭ لاۋرەاتى، قازاقستاننىڭ ەڭبەك سىڭىرگەن قايراتكەرى،«وتان» وردەنىنىڭ يەگەرى نۇرلان ورازالين،قازاقستاننىڭ ەڭبەك سىڭىرگەن قايراتكەرى، جازۋشى، «ءبيبى-انا» قايىرىمدىلىق قورىنىڭ پرەزيدەنتى بيبىگۇل يمانعازينا، ق ر مەملەكەتتىك سىيلىعىنىڭ لاۋرەاتى، جازۋشى تۇرىسبەك ساۋكەتايەۆ، ادەبيەت زەرتتەۋشى، فيلولوگيا عىلىمدارىنىڭ دوكتورى، پروفەسسور جانعارا دادەبايەۆ، بيولوگيا عىلىمدارىنىڭ دوكتورى، پروفەسسور بلوك شايكەنوۆتار ءسوز الىپ، مارقۇمنىڭ كۇردەرى دە كورنەكتى شىعارماشىلىق عۇمىرى تۋراسىندا، قايتالانباس ەڭبەكتەرى جايلى تەبىرەنە ەستەلىكتەر ايتتى.

داستارحان باسىندا اباي وبلىسىنان ارنايى كەلگەن وبلىستىق ءماسليحاتتىڭ ءتوراعاسى شالقار بايبەكوۆ، قازاقستان جازۋشىلار وداعىنىڭ مۇشەسى، اباي اتىنداعى وبلىستىق امبەباپ كىتاپحاناسىنىڭ ديرەكتورى مەرەي قارت ءسوز الىپ، جەرلەستەرىنىڭ كوڭىل ايتۋىن جەتكىزگەن. استا سول سياقتى جازۋشى، قازاقستان جازۋشىلار وداعىنىڭ حاتشىسى جۇسىپبەك قورعاسبەك، اقىن، بەلگىلى قوعام جانە مەملەكەت قايراتكەرى ءامىرجان قوسانوۆ، بەلگىلى اقىن، حالىقارالىق «الاش» ادەبي سىيلىعىنىڭ لاۋرەاتى قورعانبەك امانجولوۆ، جازۋشى، «قۇرمەت» وردەنىنىڭ يەگەرى، حالىقارالىق «الاش» ادەبي سىيلىعىنىڭ لاۋرەاتى ناعاشىبەك قاپالبەك ۇلى، قازاقستاننىڭ حالىق ءارتىسى، مەملەكەتتىك سىيلىقتىڭ ەكى مارتە يەگەرى، اكتەر دوسحان جولجاقسىنوۆتار ءسوز الىپ، مۇحاڭمەن بىرگە وكتكىزگەن ۇمىتىلماس ساتتەر جايلى جان تەبىرەنتەر ەستەلىكتەر ايتتى.

استىڭ سوڭىنا قاراي وسى شارانى وتكىزۋگە دەمەۋشىلىك جاساعان بەلگىلى مەسەناتتار بەكەت تۇرعارايەۆ پەن مەدعات قۇلجانوۆ ورتاعا شىعىپ، قازاقتىڭ تاريحى مەن ادەبيەتىن، جالپى ۇلت رۋحانياتىن وركەندەتۋگە ولشەۋسىز ۇلەس قوسقان دارا تۇلعا جايىندا ەستەلىك ايتىپ، قالامگەردىڭ ەكىنشى عۇمىرى ماڭگىلىك بولاتىنىنا سەنىم ءبىلدىردى. مۇحتار ءماعاۋيننىڭ ۇلى – ماعجان يىقتارىنا تۇسكەن اۋىر جۇكتى ءبولىسىپ، قايعىلارىنا ورتاقتاسقان قازاق حالقىنا، اسقا ارنايى كەلىپ كوڭىل ايتىپ جاتقان جۇرتشىلىققا وتباسى اتىنان العىسىن جەتكىزدى.