Speedtest Global Index 2024 جىلعى جەلتوقسان ايىنىڭ قورىتىندىسىن شىعارىپ، ەڭ جىلدام ينتەرنەتى بار ەلدەر مەن قالالاردىڭ رەيتينگىن جاريالادى.
جاڭا زەرتتەۋدە ماماندار 154 ەلدىڭ 200-گە جۋىق قالاسىنداعى ءموبيلدى ينتەرنەت پەن كەڭجولاقتى جەلىنىڭ ورتاشا جىلدامدىعىن تالداپ شىققان.
ايتا كەتەيىك، Speedtest Global Index باعالاۋ كريتەرييلەرىنە اقپاراتتى جۇكتەۋ مەن جولداۋ جىلدامدىعى كىرەدى. باعالاۋ كەزىندە ءموبيلدى جانە كەڭجولاقتى جەلىلەر ەسەپتەلەدى.
سونىمەن الەمدىك سەرۆيس مالىمەتتەرى بويىنشا، ءموبيلدى ينتەرنەت جىلدامدىعى بويىنشا قازاقستان ءبىر ساتىعا كوتەرىلىپ، 57-ورىنعا جايعاستى. ورتاشا جۇكتەۋ جىلدامدىعى – 53،76 مەگابيت/سەكۋند. ال 58-ورىندا جاپونيا تۇر (53،54 مەگابيت/سەكۋند).
الايدا كەڭجولاقتى ينتەرنەت جىلدامدىعى بويىنشا قازاقستاننىڭ رەيتينگى تومەن، ناقتى ايتقاندا ەلىمىز الەم بويىنشا 88-ورىندا تۇر (ورتاشا جىلدامدىق – 73،67 مەگابيت/سەكۋند).
ءموبيلدى ينتەرنەت جىلدامدىعى بويىنشا كوش باستاپ تۇرعان ءۇش ەل:
- بىرىككەن اراب امىرلىكتەرى – 453،87 مەگابيت/سەكۋند؛
- كاتار – 383،5 مەگابيت/سەكۋند؛
- كۋۆەيت – 257،3 مەگابيت/سەكۋند.
ەڭ تومەنگى كورسەتكىش تاعى دا اۋعانستاندا تىركەلدى. مۇندا جۇكتەۋ جىلدامدىعى بار بولعانى 8،2 مەگابيت/سەكۋند.
ال قالالارعا كەلەتىن بولساق، ەلىمىزدەگە ينتەرنەتى ەڭ جىلدام قالا - الماتى (93.71 مەگابيت/سەكۋند). بۇل تۇستا ول 2 ساتىعا تومەندەپ كەتكەنىن ايتا كەتەيىك. ال استانا رەيتينگتە 2 ساتىعا كوتەرىلىپ، 71-ورىنعا تۇراقتاعان (83.87 مەگابيت/سەكۋند).
ءبىر قىزىعى كەڭجولاقتى ينتەرنەت بويىنشا جاعداي كەرىسىنشە، ياعني استانا 97-ورىنعا (83.88 مەگابيت/سەكۋند) كوتەرىلسە، الماتى 103-ورىندا (80.21 مەگابيت/سەكۋند) تۇر.
ال الەم بويىنشا ءموبيلدى ينتەرنەت جىلدامدىعى بويىنشا كەلەسى قالالار كوش باستاپ تۇر:
- ابۋ-دابي (بىرىككەن اراب امىرلىكتەرى) - 527.65 مەگابيت/سەكۋند؛
- دۋباي (بىرىككەن اراب امىرلىكتەرى) - 424.33 مەگابيت/سەكۋند؛
- ار-راييان (قاتار) - 416.67 مەگابيت/سەكۋند.
پىكىر قالدىرۋ