الماتى قالاسى پروكۋراتۋراسىنىڭ ۇيلەستىرۋىمەن پوليسيا دەپارتامەنتى ءبىر فيرما باسشىلارىنا قاتىستى ازاماتتاردىڭ ۇجىمدىق جولدانىمى بويىنشا باستالعان قىلمىستىق ءىستى تەرگەپ-تەكسەرۋدى اياقتادى.
كومپانيا باسشىلىعى تۇرعىن ءۇي كەشەندەرىنىڭ قۇرىلىسىنا رۇقسات قۇجاتتارىنسىز جانە ۇلەسكەرلەردىڭ قاراجاتىن تارتۋ قۇقىعىنسىز 2022-2023 جىلدار ارالىعىندا ءۇش تۇرعىن ءۇي كەشەنىندەگى پاتەرلەردى ساتۋ سىلتاۋىمەن ازاماتتاردىڭ اقشاسىن الداۋ جولىمەن جىمقىرعانى انىقتالدى.
اتالعان ءىس بويىنشا 312 ادام جابىرلەنۋشى دەپ تانىلىپ، جالپى شىعىن 2،5 ملرد تەڭگەدەن اسقان. جاۋاپكەرشىلىگى شەكتەۋلى سەرىكتەستىكتىڭ ءتورت باسشىسى ۇستالىپ، قازىرگى تاڭدا قاماۋدا وتىر، - دەلىنگەن پروكۋراتۋرا حابارلاماسىندا.
تەرگەپ-تەكسەرۋ اياسىندا جابىرلەنۋشىلەردىڭ قۇقىقتارىن قالپىنا كەلتىرۋ قامتاماسىز ەتىلدى، ال قىلمىستىق ءىس ءمانى بويىنشا قاراۋ ءۇشىن سوتقا جولداندى.
الماتى قالاسىنىڭ پروكۋراتۋراسى ازاماتتارعا قۇرىلىس كومپانيالارىمەن كەلىسىمشارتقا ءتۇسۋدىڭ الدىندا مۇقيات تەكسەرىپ، تەك رەسمي قۇجاتتار نەگىزىندە عانا قاراجات سالۋ قاجەتتىگىن ەسكەرتەدى.
پىكىر قالدىرۋ