دەنساۋلىق ساقتاۋ مينيسترلىگى ەلدە شەكتىك باعانى بەلگىلەۋ ساياساتى ەنگىزىلگەن سوڭ دارى-دارمەك قۇنى 10-25%-عا دەيىن ارزاندايتىنىن مالىمدەدى.
ورتالىق كوممۋنيكاسيالار قىزمەتى الاڭىندا وتكەن بريفينگ بارىسىندا دارى-دارمەك ساياساتى دەپارتامەنتىنىڭ ديرەكتورى جاندوس ءادىلحان ءدارى باعاسىندا قانداي وزگەرىستەر بولاتىنىن ايتتى.
"ءقازىر دارى-دارمەك باعاسىن بەلگىلەۋدىڭ جاڭا مەحانيزمى قابىلداندى. سوعان بايلانىستى دەنساۋلىق ساقتاۋ مينيسترلىگىندە ەكسپەرتتىك ساراپتاما ورتالىعى بار. جوبامەن دارى-دارمەك باعاسى 10-25% تۇسەدى دەپ بولجانىپ وتىر"، – دەدى ول.
مينيسترلىك وكىلدەرىنىڭ مالىمەتىنشە، الداعى ۋاقىتتا ءدارى باعاسىنا قاتىستى بۇيرىق جاريا ەتىلەدى. بۇيرىقتا دارىلەردىڭ جاڭا باعاسى كورسەتىلەدى ەكەن.
سونداي-اق جاندوس ءادىلحان 2025 جىلى ەلدە تەگىن بەرىلەتىن دارىلەردىڭ تاپشىلىعى بولمايدى دەپ سەندىردى.
"بۇگىندە بۇل ماسەلە ءوز شەشىمىن تاپتى. بيىل ءدارىنى ساتىپ الۋ پروسەسى ەرتە جۇرگىزىلگەندىكتەن، بارلىق ەمدەۋ مەكەمەلەرى دارىمەن قامتىلدى. سونداي-اق بۇگىندە "سك-فارماسيا" كومپانياسى تاراپىنان تومەندەمەيتىن قور قالىپتاستى. بۇل جوبا بيىل العاش رەت ەنگىزىلدى. اتالعان قور قاجەتتىلىگىنە بايلانىستى دارىلەرمەن تولىقتىرىلىپ وتىرادى. سوندىقتان 2025 جىلى تەگىن ءدارىنىڭ تاپشىلىعى بولمايدى دەپ بولجاۋعا بولادى"، – دەپ قوستى ول.
پىكىر قالدىرۋ