الەۋمەتتىك جەلىلەردە "راقمەت" ايتىپ سيگنال قوسقانى ءۇشىن ايىپپۇل سالىنعانى تۋرالى ۆيدەو كەڭ تارالدى. ەر ادامدى سيگنال قوسقانى ءۇشىن ەمەس، اپاتتىق جاعداي تۋعىزعانى ءۇشىن جازالاعانى بەلگىلى بولدى.
قازاقستاندىقتار اراسىندا جول بەرگەنى ءۇشىن اۆاريالىق سيگنالدى قوسۋ ادەپتىلىك دەسە، ءبىرى بۇل اپاتتىق جاعدايدا عانا قوسىلاتىن سيگنال دەگەن سەكىلدى پىكىرلەر تارادى.
سونىمەن "راقمەت" ايتۋ ماقساتىندا اۆاريالىق سيگنالدى قوسقانى ءۇشىن ايىپپۇل سالىنادى ما؟ جاعدايدى باس پروكۋراتۋرا باسقارماسىنىڭ باستىعى جاسۇلان داۋلەمبايەۆ ءتۇسىندىردى.
"اۆاريالىق سيگنال قوسقانى ءۇشىن جاۋاپكەرشىلىك تۋرالى ايتساق، جولدا كەز كەلگەن سۇراقتى قاراستىرعاندا جول قوزعالىسى ەرەجەلەرىنىڭ تالاپتارىن باسشىلىققا الۋ كەرەك. ەرەجەلەردە اۆاريالىق جارىق سيگنالىن قوسۋدىڭ ناقتى جاعدايلارى كورسەتىلگەن. ولارعا جول-كولىك وقيعالارى، توقتاۋعا تىيىم سالىنعان جەرلەردە ءماجبۇرلى توقتاۋ، كەرى قوزعالىس جانە تاعى باسقالار جاتادى. مۇنداي جاعدايلاردان بولەك، جول قوزعالىسى ەرەجەلەرىنە سايكەس اۆاريالىق سيگنال باسقا دا جاعدايلاردا دا، كولىك قۇرالىنىڭ ءقاۋىپ ءتوندىرۋى مۇمكىن ەكەندىگىن ەسكەرتۋ ءۇشىن قوسىلۋى مۇمكىن.
ەگەر بىرەۋدىڭ وتۋىنە مۇمكىندىك جاساپ، كومەكتەسكەنىڭىز ءۇشىن العىس ءبىلدىرۋ ماقساتىندا سيگنال قوسساڭىز، بۇل جول قوزعالىسى قاتىسۋشىلارىنا ەسكەرتۋ رەتىندە قارالادى جانە جاۋاپكەرشىلىككە تارتىلمايدى. بىر-بىرىڭىزگە كومەكتەسىپ، راقمەت ايتا بەرىڭىزدەر!" – دەپ ءتۇسىندىردى داۋلەمبايەۆ.
پىكىر قالدىرۋ