پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەلەرىنى اتا-انالار قاۋىمداستىعىنا ۇندەۋ جاريالادى.

قۇرمەتتى اتا-انالار! 19 قاڭتاردا استانادا ءبىزدى ءبارىمىزدى تەرەڭ قايعىعا باتىرىپ، ەسەڭگىرەتكەن قايعىلى وقيعا بولدى. ونلاين ويىندارعا تاۋەلدىلىك تۋرالى ەسكەرتۋ جاساعان كەزدە تۋىنداعان جانجال سالدارىنان جاقىن تۋىسىنىڭ قولىنان ءبىر ادام قازا تاۋىپ، ۇشەۋى جاراقات الدى. وقيعا ءمان-جايى ءالى انىقتالۋدا. ءبىز قايعىلى جاعدايعا تاپ بولعان ادامنىڭ تۋىستارى مەن جاقىندارىنا جانە وسى تراگەديادان زارداپ شەككەن بارلىق ادامدارعا تەرەڭ قايعىرىپ، كوڭىل ايتامىز. بۇل جاعداي بىزگە بالالارىمىزدىڭ قىزىعۋشىلىقتارىنا جانە حوببيلەرىنە قانشالىقتى نازار اۋدارۋ قاجەتتىگىن كورسەتەدى. بۇگىنگى كۇنى سيفرلىق تەحنولوگيالار ءومىرىمىزدىڭ بولىنبەس بولىگىنە اينالدى. جاستار، اسىرەسە جاسوسپىرىمدەر، ۋاقىتتىڭ كوپ بولىگىن ۆيرتۋالدى الەمدە وتكىزۋدە. «Kazakhstan Kids Online» زەرتتەۋىنە سايكەس، قازاقستانداعى بالالاردىڭ 15%-ى كۇندەلىكتى ينتەرنەتتە تەرىس كونتەنتكە كەزىگۋدە. ۆيدەويگرلەرگە، الەۋمەتتىك جەلىلەرگە جانە ونلاين قارىم-قاتىناسقا تاۋەلدىلىك ارتىپ كەلەدى. بۇل، ءوز كەزەگىندە، الەۋمەتتىك وقشاۋلانۋعا، وتباسىنداعى تۇسىنبەۋشىلىك پەن جانجالدارعا اكەلەدى، - دەلىنگەن ۇندەۋدە.

ۇلتتىق كوميسسيا بالالاردىڭ قىزىعۋشىلىقتارى مەن پروبلەمالارىنا كوبىرەك نازار اۋدارۋعا شاقىرادى. 

بالالارىڭىزدىڭ ومىرىنە قاتىسۋ، ولاردىڭ حوببيلەرىنە شىنايى قىزىعۋشىلىقپەن قاراپ، اشىق اڭگىمەلەر جۇرگىزۋ – ولاردىڭ ۇيلەسىمدى دامۋى مەن مۇمكىن بولاتىن تراگەديالاردىڭ الدىن الۋدىڭ نەگىزى. سونىمەن قاتار، ءبىز اتا-انالارعا «اتا-انا باقىلاۋى» قۇرالدارىن پايدالانىپ، بالالاردىڭ ينتەرنەتتە وتكىزەتىن ۋاقىتى مەن تۇتىناتىن كونتەنتى تۋرالى اقپارات الۋدى ۇسىنامىز. بۇل بالالاردى ارتىق گادجەتتەرمەن شۇعىلدانۋدان، دەسترۋكتيۆتى ويىنداردان قورعاۋعا جانە كيبەرقاتەرلەرمەن بايلانىستى قاۋىپتەردى ازايتۋعا كومەكتەسەدى. كيبەرقاۋىپسىزدىككە قامقورلىق جاساۋ – وتباسىنىڭ ءال-اۋقاتىنىڭ ماڭىزدى بولىگىنە اينالۋدا. قازىرگى ۋاقىتتاعى جاعدايلار اتا-انالارمەن بالالارىنىڭ اراسىنداعى قارىم-قاتىناسقا از ۋاقىت قالدىرادى. الايدا ەشقانداي جۇمىس بالالاردىڭ ءومىرى مەن دەنساۋلىعىنان ماڭىزدى بولا المايدى. وتباسىندا سەنىمدى اتموسفەرا قۇرىپ، بالالاردىڭ قاۋىپسىزدىگىن باقىلاپ، ەڭ باستىسى – بالالارىڭىزعا ۇلگى بولىڭىزدار! بۇل تراگەديا ءبىز ءۇشىن تاعى ءبىر ساباق بولار جانە ءوزىمىزدىڭ باسىمدىقتارىمىزدى قايتا قاراۋىمىزعا سەبەپ بولادى. تەك وتباسى، مەملەكەت جانە قوعامنىڭ بىرلەسكەن كۇش-جىگەرى ارقىلى عانا ءبىز بالالارىمىز ءۇشىن ءقاۋىپسىز ءارى گۇلدەنگەن بولاشاق قۇرا الامىز. بالالارىمىز بىزبەن بىرگە بولسىن! - دەيدى كوميسسيا مۇشەلەرى.