قوستانايدا تۋريستىك قىزمەت كورسەتۋ سالاسىندا ارەكەت ەتكەن اگەنتتىك پوليسەيلەردىڭ قاداعالاۋىنا الىندى.

شەتەلگە تۋرلار ۇيىمداستىراتىن كومپانياعا كليەنتتەردىڭ جاپپاي شاعىمدانۋى قۇقىق قورعاۋ ورگاندارىنىڭ نازارىن اۋدارتتى. قازىرگى ۋاقىتتا پوليسياعا زارداپ شەككەندەردەن 53 ارىز ءتۇستى. 

ارىز يەلەرى ەگيپەت، تۇركيا، تايلاند، ۆەتنام جانە قىتايعا ساياحاتتار ءۇشىن الدىن الا تولەم جاساعان، الايدا، ۋادە ەتىلگەن قىزمەتتەردى الا الماعان. كەيبىرى تۋرلاردىڭ قۇنىن تولىق تولەسە، باسقالارى ءىشىنارا تولەگەن. سوعان قاراماستان، اقشالارى قايتارىلماعان ءارى تۋرلار بروندالماعانى بەلگىلى بولدى. كليەنتتەر ساياحاتتاردى اگەنتتىك كەڭسەسىنە كەلىپ نەمەسە تەلەفون ارقىلى برونداعان. 

تولەم قولما-قول جانە بانكتىك اۋدارىم ارقىلى جۇرگىزىلگەن. ءبىراق ۇشۋ كۇنى كەلگەندە، ساياحاتتارعا تاپسىرىستىڭ مۇلدە جاسالماعانى انىقتالدى. الدىن الا ەسەپتەۋلەر بويىنشا، كەلتىرىلگەن شىعىن كولەمى 40 ميلليون تەڭگەنى قۇرايدى. اگەنتتىك وكىلدەرى ايىپتاۋلارعا جاۋاپ رەتىندە قارجى يەمدەلمەگەنىن، ال تۋرلار وزىندىك قۇنىمەن ساتىلعاندىقتان، وسىنداي قيىندىقتار تۋىنداعانىن مالىمدەدى، - دەلىنگەن اقپاراتتا.

پوليسەيلەر تەرگەۋ بارىسىندا تۋريستىك پاكەتتەرگە قاتىستى برونداۋدى راستايتىن ەشقانداي قۇجاتتاردىڭ جوق ەكەنىن انىقتادى. قازىرگى ۋاقىتتا ەكى نەمەسە ودان دا كوپ ادامنىڭ شىعىنعا ۇشىراۋىنا بايلانىستى الاياقتىق فاكتىسى بويىنشا سوتقا دەيىنگى تەرگەۋ جۇمىستارى جۇرگىزىلۋدە. كۇدىكتى-جەكە كاسىپكەر قاماۋعا الىندى، تەرگەۋ جالعاسىپ جاتىر. پوليسيا وسىنداي جاعدايعا تاپ بولعان بارلىق ازاماتتاردى قۇقىق قورعاۋ ورگاندارىنا حابارلاسۋعا شاقىرادى.