پرەزيدەنت توقايەۆتىڭ سوزىنشە، تۋريزم ەكونوميكانىڭ وسۋىنە جاڭاشا سەرپىن بەرەتىن سالا بولۋى قاجەت.
"بۇل باعىتتا ءبىز ارتتا قالىپ بارامىز، جۇمىس ماردىمسىز ءجۇرىپ جاتىر. ەلىمىزدىڭ ءار ايماعىندا كورىكتى جەرلەر بار. شەتەلدەن جانە ەل ىشىنەن كەلگەن تۋريستەر ءبىزدىڭ قايتالانباس قورىقتارىمىزدى ارالاپ كورگىسى كەلەدى. ءبىراق بەلسەندى جانە اۋقىمدى ءتۋريزمدى دامىتۋ ءۇشىن جاعدايىمىز جەتكىلىكتى ەمەس"، - دەدى ول ۇكىمەتتىڭ كەڭەيتىلگەن وتىرىسىندا.
مەملەكەت باسشىسى سول سەبەپتى جەكە ينۆەستورلاردى دا تارتا وتىرىپ، قاجەتتى ينفراقۇرىلىم سالۋ جۇمىسىن دەرەۋ باستاۋ قاجەت ەكەنىن ايتتى.
"تۋريزم سالاسىنىڭ ينۆەستيسيالىق الەۋەتىن كۇشەيتۋگە ارنالعان كەز كەلگەن باستاماعا قارسى شىعاتىن ادامداردىڭ جەتەگىندە كەتپەۋ كەرەك. ماڭعىستاۋدا ايگىلى بوزجىراعا بايلانىستى سونداي جاعداي بولعانىن بىلەسىزدەر. ۇكىمەت پەن جەرگىلىكتى مەكەمە وكىلدەرى ىسكەرلىك احۋالدى جاقسارتۋ ءۇشىن نەعۇرلىم باتىل شارالار قابىلداۋعا ءتيىس. مەن ەكونوميكاعا ينۆەستيسيا تارتۋ ماسەلەسىن بەكەردەن-بەكەر باستى ورىنعا قويىپ وتىرعان جوقپىن. مۇنىڭ دا ستراتەگيالىق ماڭىزى زور. ەكونوميكامىزدىڭ بولاشاعى مەن ەلىمىزدىڭ الەم كارتاسىنداعى ورنى، ەڭ الدىمەن، وسىعان بايلانىستى"، - دەدى توقايەۆ.
پىكىر قالدىرۋ