28 قاڭتاردا ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆ سايلاناتىن اكىمدەر اراسىندا مەملەكەتتىك قىزمەتتە ىستەمەگەن ءارى جاستار كوپ ەكەنىن ايتىپ، ولاردى دايىندىقتان وتكىزۋ ءۇشىن “اكىمدەر مەكتەبى” جوباسىن قوسۋدى تاپسىردى.

پرەزيدەنت اتالعان جوبانى ىسكە قوسۋ ءۇشىن وسىنداي جۇمىستى جۇرگىزىپ جاتقان "اmanat" پارتياسىنىڭ تاجىريبەسىن ەسكەرگەن ءجون دەيدى. 

"العا قويىلعان مىندەتتەردى جۇزەگە اسىرۋ ءۇشىن تۇتاس مەملەكەتتىك اپپارات ءتيىمدى جۇمىس ىستەۋى كەرەك. اكىمدەردى تىكەلەي سايلاۋدىڭ ناتيجەسىندە مەملەكەتتىك قىزمەتكەرلەردىڭ جاڭا ساناتى – سايلاناتىن باسشىلار پايدا بولدى. بۇل – ەكى جارىم مىڭنان استام باسشى لاۋازىمىنداعى قىزمەتكەر دەگەن ءسوز. ولاردىڭ اراسىندا بۇرىن مەملەكەتتىك قىزمەتتە جۇمىس ىستەمەگەن ازاماتتار، سونىڭ ىشىندە جاستار كوپ. سول سەبەپتى سايلانعان اكىمدەر مەن ءتۇرلى دەڭگەيدەگى باسشىلاردى كەشەندى دايىندىقتان وتكىزۋ ماسەلەسى وتە وزەكتى بولىپ تۇر. ۇكىمەتكە مەملەكەتتىك قىزمەت ىستەرى اگەنتتىگىمەن بىرلەسىپ، "اكىمدەر مەكتەبى" وقىتۋ جوباسىن ىسكە قوسۋدى تاپسىرامىن. بۇل رەتتە وسىنداي جۇمىستى جۇرگىزىپ جاتقان "اmanat" پارتياسىنىڭ تاجىريبەسىن ەسكەرگەن ءجون”، – دەپ مالىمدەدى ۇكىمەت وتىرىسىندا. 

قاسىم-جومارت توقايەۆتىڭ سوزىنشە، مەملەكەتتىك اپپارات ازاماتتارمەن ۇدايى بايلانىستا بولۋى كەرەك. 

“ونسىز بولمايدى. سوندىقتان حالىقتان كەلىپ تۇسەتىن وتىنىشتەرگە ايرىقشا نازار اۋدارۋ قاجەت. بىلتىردىڭ وزىندە پرەزيدەنت اكىمشىلىگىنە 50 مىڭنان استام ءوتىنىش كەلىپ تۇسكەن، ال ەلىمىزدەگى بارلىق مەملەكەتتىك ورگاندارعا شامامەن 4 ميلليون ءوتىنىش جولدانعان. بۇل كورسەتكىش جىلدان جىلعا كوبەيۋدە. ءبىر جاعىنان، بۇل جۇرتتىڭ "حالىق ۇنىنە قۇلاق اساتىن مەملەكەت" تۇجىرىمداماسىنا سەنەتىنىن كورسەتەدى. الايدا سونىمەن بىرگە، بۇل ولاردىڭ وتىنىشتەرى مەن ماسەلەلەرى مەملەكەتتىك ورگانداردىڭ كۇندەلىكتى جۇمىسى بارىسىندا شەشىمىن تاپپاي جاتقانىن اڭعارتادى. سوندىقتان ولقىلىقتار مەن كەمشىلىكتەردى جويۋ ءۇشىن تياناقتى جۇمىس جۇرگىزۋ قاجەت. ادەتتە ازاماتتاردىڭ وتىنىشتەرىنىڭ ارتىندا ادام تاعدىرى تۇرادى. سوندىقتان بۇل جەردە بارلىق قۇزىرلى ورگان جۇمىلا جۇمىس ىستەۋگە ءتيىس"، – دەيدى ول.