قۇجاتقا ساي، قازاقستان رەسپۋبليكاسىنىڭ اۋماعىنان تىسقارى، ونىڭ ىشىندە ەۋرازيالىق ەكونوميكالىق وداققا مۇشە مەملەكەتتەرگە اۆتوموبيل كولىگىمەن بەنزين، ديزەل وتىنى جانە مۇناي ونىمدەرىنىڭ جەكەلەگەن تۇرلەرىن (2709 00، 2710، 2902، 3403، 3811، 3826 00 ەاەو سەق تن كودتارى) اكەتۋگە التى اي مەرزىمگە تىيىم سالۋ ەنگىزىلگەن.

تىيىم مىنا ونىمدەرگە تارالمايدى: 

مايلاۋ مايلارىنا (2710 19 820 0، 2710 19 840 0، 2710 19 860 0، 2710 19 880 0، 2710 19 920 0، 2710 19 940 0، 2710 19 980 0، 3403 19 900 0، 3403 91 000 0 ەاەو سەق تن كودتارى)؛
دايىنداۋشى زاۋىتتا كوزدەلگەن اۆتوموبيل كولىك قۇرالدارىنىڭ بەنزين باكتارىنداعى بەنزينگە؛
عىلىمي-زەرتتەۋ جۇمىستارىن جۇرگىزۋ ءۇشىن الىنعان اۆياسيالىق وتىنعا (ۋاكىلەتتى ورگانمەن كەلىسىلگەن جانە قاجەتتى اۆياسيالىق وتىن ۇلگىلەرىنىڭ كولەمى كورسەتىلگەن حات بولعان جاعدايدا)؛
قازاقستان رەسپۋبليكاسى ۇكىمەتىنىڭ شەشىمى بويىنشا گۋمانيتارلىق كومەك شەڭبەرىندە اكەتىلەتىن مۇناي ونىمدەرىنىڭ جەكەلەگەن تۇرلەرىنە.
ق ر ەنەرگەتيكا مينيسترلىگى بۇل شارا ىشكى نارىقتا جانار-جاعارماي تاپشىلىعىنا جول بەرمەۋ ءۇشىن جاسالعانىن اتاپ وتكەن. 

ايتا كەتەيىك، بۇيرىق 29 قاڭتاردان باستاپ كۇشىنە ەندى.